Home Opinion Magaral tamung Capampangan(14th of a series)

Magaral tamung Capampangan
(14th of a series)

245
0
SHARE

Pacabitasan – siguraduan;  Menasa – madalas
‘Casebian a macaba picuanan’ – mapanupaya
‘Mataram a gunting’ – matas a singil
Malamiac – macupad kimut,  cusad pau.

Penanandit – potang bagia, saguli namu
Catalacsan – sobra caracal, catambac
‘Casebian a maki-apalya gulut’ – matamad
Penarasti – pemanuldu  ing casabi ning taung mua.

Mengupeti – daig, saul, tatacut lumaban
Tiniplad – menginlag,  tinalilis,  linisya
‘Casebian a keng capipili mitud ya keng bungi’ –
mipasala ya ing sobra caselan, miras king e na buri.

‘Casebian a ing bugasuc ampon dapal, nung masucsuc
ya malalam’ – iti agyang keng literal a bunga nang
cabaldugan, nung misabal ca keng kuayan o nanu man
magcang e ka mu masugat nun’e akua mung mibulang.

Panalumduman – panintunan;  Siglawe – sinabi
Pemalpac – piragli,  pinyamal, kinua keng mabilisan
Malumuc-lumuc – malambut antimong cutsun
Payatut – balamu acbac keng caympis a catawan.

Palasada – singil o upa ning pasabong balang sultada
Capacumbaban – cababan lub, ‘humility’ keng English.
Casapuego – ‘posporo’ keng tagalog, ‘match’ in English
Dalampang – aus caring mete macatalindata

Macatalindata – macabulagta, ‘facing the sky’
Pigumguman – metung a insidente  a nu’ mitipun la
ring dacal a taung mecakit king e caraniwan a bage
piyaglo ra, alimbawa king cabalenan o nucarin man.

Alacton – alampasan,  e mirinan cauculan pansin
Simpulungan – piyabe-abe,  tinipun at inaptas
Laguma – cabilugan a bilang o ‘total amount’
Sicapat-apat – tiapat-apat a dake king balang catau.

Panalangin – pangadi, cayaduanan king Ginung Dios
Magparalampu – magpacalunus maniad saup.
Maniambitan – magmacalunus, magdulap catalaruan
anti na ning ing metung a tau medacurac ya catuliran.

Dusa at palsimi – matinding casakitan at lungcut
ing pawaga niti at buring ipasyag;  cabang ing
Cusuelu at tula – cabaligtaran ning pasakit at lugma.
Ligaya – migit pa king sabla, yang pecamasaya.

Bayani – taguri ya at bansag king taung mapuri
at nung nu’ ing solung bie at panga-tau niti
itaya na para king balen, keca at canacu pati
mie tamung payapa king bansang sarili.

Alang kikilingan – ing tune buri nang sabian
niti king metung a taung ating bitbit a tetagan,
e na picabiang ing mipase at mate keng dalan
basta’t atyu keng matulid at alang dilpac ninu man.

Casebian da ring macatua, a ing  e ta’ buring miras
king kecatang payapag bie, antimo ing ken medalpac,
pacapangilagan tamu ing atin tang adamusac
ban ing maging sucli niti e lalung migit maparas.

(Maracal-dacal la’t ala pang capitna
caring amanu at mana tang salita
ding patunggal-tunggal keng lipang cung diwa
gigisingan banting miuman lang sagiwa~,) 

LEAVE A REPLY

Please enter your comment!
Please enter your name here