Nung pamitan yu lang abalu mu naman
ding salitang parehu mu cabaldugan,
ayantimo ing melimbato – mecalinguan,
ing asna casimpling buri niting sabian.
Ibuclat ke’ing baul ding mabie pang sabi
a malagad dana mung damdaman ngeni
ding bista’t bait lang capampangan deti,
pero e ro balu ding dacal careti.
King Pamantasan ning Holy ke’ parehung
meging ‘Consultant’ keng CKS ping Among
Venancio Q. Samson, Frank Guinto – sinulung
Ing keng Sabi tamung mana pamangambul.
Capamilatan ding magazine at saca
mialiwang pamasan a milual canita;
ing lengguheng ing Dios – ing minie inawa
anti reng siglungan a bie ring poeta.
Anti na ning ding ken mialiwang balen
atin lang salitang e milulupa ren
a cabaldugan at catumbalas pin ken,
ilang tucalan tang patunggal-tunggal den.
Antimo ing ‘abuab, paratut, mayabang,
mayangain a buntuc,’ den ing camatutuan
ampo ing ‘sapak ya oxygen king atyan’
mipaparehu la reti buring sabian.
Ing ‘caministilan’ a malagad tana
mu namang damdaman neng misasabi la
ring ngeni ken medyu maidad-idad na,
keng simpling salita iti ‘cailangan’ ya.
‘Cararagli, agad-agad, marapalan,’
den mipaparehu la’mu cabaldugan;
antimurin ing ken ngara ‘pamamaltang’
keng English ginamit cang ‘short cut’ a dalan.
At ban e masulit, anti pa canini
porma o estilu ing tukyan parati;
Antining asna la mupin keng kasimpli,
mas mabilis yu lang cabisaduan deti.
Tiaman-tiaman – panatag, alang tigatig
Makasnuc – makasora, macabuysit
Turak – masira –sira, malintuang
Wagan-wagan – tinap-tinapan, isip-isipan
Ketubasan – prutas a sobra calulut
Magdidiral – mapanecas, balasubas
Pamamali – ablas a makirut, ‘paghihingati sa tagalog
Casingkilan – cayabiayan, kadaupan palad
Cangatba – casumangid ilug o sapa
Masalacata – malabit, tsismosa, masalita
Magsimbambalu – mapagkunwari, dapat a pigawa
Lamaran – alang marine, alang taung keya matula.
Lamiran – matako, sugapan keng pamangan
Marukat – matsura, dimut keng leguan
Patikolodyung – akasya aus da ring keraklan
Pataniran – patungculan, pamaramdaman
Salingsing – salubsub, metusuc a taliri
Salabusab – magaspang a panugali
Mampit – paindalan, salangi
Salaingian – sindian ing sulugi.
(Atin ya pang casuglung)
