Gagaligatsu – gagagad, sasamal, marapal
Gugulasyo – gugulisac, magcangie
Mapagcumbaba – mapanupaya
Sulut – susi, (key in English)
Rason – casangcanan, dahilan
Ibalaus – isundu, ibalayun, isulung
Migbakwit – meco pansamantala king
lugal a santungan pasari ning calamidad
At neng gyera – at iting ‘migbakwit’
amanu yang ibat king salitang English,
a ‘evacuate or move to a safer place,’
ban aiwasan ing nanu mang panganib.
Sanacan – carculan, tantiaan, timtiman
den mipaparehu la mu cabaldugan
at/o caya ngara pin capupuntalan,
nu’ anti caba at cabayat keng timbang.
Ampiad-ampiad – magpalele-lele yan
‘Salud piga’ – ila ken ding amanuan dang
taung aliwa yang kecang pakisabyan
pero iti ya ing mamatba nung misan.
Cacaliskis – a nung wari caring asan,
lialu, alugasin, bulig ding magaspang
a balat, iti ing aus da keraclan
king taung ing asal na e picasaban.
Mataluras – iting mesabing amanu,
ala yang keliwan king metung a tau,
a nung mica-utang ya keca o cacu,
hito yang mistula catalusad pihu;
Karas keng singilan at/o pamamayad
macatatlu na ca mamalit tsinelas
keng pabalic-babalic manyingil, yan mecad
e me acapcap keng sobra katalusad.
Alimbawa, pengacuanan na cang Lunes,
e ca macapihung dasan me ing dyakis;
nung inyasa’t caring ngeni mamie ‘five-six’
dacal no’ yata ring mete macangisngis?
Aliguat – amuyut, agcat king e mayap
Tucsu – antimurin ing otor – Satanas;
Di Adan at Eba, uli ning aliguat
ning Ari ning dulum – ing bie ra mecuyad.
Mengabus – iti ing amanung i Cristo
ing patuyag na ning mesabing Amanu
king Ya ing menatbus king mortal a Tau,
ban mipatawaran sala ta’ king Guino!
Salangsangan – tutulan, labanan, contraan
Paingkinyan – panusigan, pabusten, tulutan,
Palablaban – e mu ing calabcab a literal
ning api king pusu at lugud at sakdal.
‘Bunduc da ring bungu’ – Iti ya ing nu’ re
lugal dela i Jesus at nu’ mibayube
keng panga-pacu Na king Cruz, at ken Mete
ing Anac ning Ibpa, at menatbus king bie
At caladua’ing Tau ban e ya mabaldug
king Impyerno at nu’ ing Keyang tibubus
a lugud king Tau mengibabo lubus,
angga king mepatad Ya inawa king Cruz!~
