Home Opinion Magaral tamung Capampangan (15th of a series)

Magaral tamung Capampangan (15th of a series)

431
0
SHARE

Mapagpatatu – magpasipsip, mapagpalapad (papil)
‘Casebian a magdidiral’ – mapanecas
Tumbaga – Ipan a kebitanan gintu, pasta
Para gala – dininan para cusuelu, kapasalamatan

Calubcuban – alang laman kilub, ‘hollow’ (inglis)
Urung-sulung – mamicacunu, bantulut
Paltakiuran – taung e picasaban a ugali,
mapad keng indredus, ‘marites’ (bayung bersyon).

Libaran – durutan;   Sapacan – catmuan
Itabas – idake;  Saludsuran – pakicuanan akit
Capanintunan – obra, propesyon, ‘job’ (inglis)
Pakitalastasan – pakibaluan masalese, linawan;

Sapliran – barugan pilatan ning buldit at butit
Yagpa – lebel itas diretsu ding aduang gamat,
capante ning pago. Iti metung a uring caparusan
ding titser  canita careng anac a magaral.

(Bawal na ngeni ing barugan nala ning titser o talaturu
reng anac a magaral,  at iti atin nang  carampatan  a
casu a maliaring isampa laban carela sacali’t ing anac
apanasakit de king uli ning atin yang gewang e ustu).

Baslen – baltangan;  Bislen – biltangan  (past tense)
Tiniplad – linisia;  Mengilag – miniwas,
Kildasan – kinuldas keng saken ban paindalan o
ating salangian para pakikitan at pakisabian.

Timalad – capamalacan;  Salusunan – dakitan
Caustan – catunayan;  Testigu – sacsi, magpatutu
Inamyam – tinggap ing e sucat;  nu’ man anti caplas,
inacmul ing pait at dusa king uli ning aliwang tau.

Salimpapo – e ustu keng sucad a dapat catmu
Saragati – anac a salbahe, maki-calocuan.
Wasang-wasang – mipaburen, e malilingun ustu
Alang casimpara – alang cabas, alang calupa.

Patundunan – cusintian, campian,  paragulan a lub
‘Singsing a timpucan’ – ‘a ring with a birthstone’
o nanu mang klasing singsing a maki-batu
at  ating macayasad a disenyu a e caraniwan.

Palpakitua – ugali ring aliwang tau a mapad keng
dibati at agiang e ustu ing carela, ipilit at ipilit da;
ila ren detang e tatanggap camalian, at e bisang
pasaul keng nanu mang pacsang bage pisasabian.

Nu’me kine? – nu’me kebit ing cabaldugan niti.
Seradura – candadu, ‘padlock’ keng inglis.
Bandehadu – pinggan a paglunanan ulam o nasi
Pultera – datucanan  mialiwang clasing prutas.

Salungcaki – patungan o pitumpacan  calang a capsa
Talaingat bandi – tesoreru,  ingat-yaman (tagalug)
Pipanganan – lugal a nu’ ring pinggan, cubiertus at
aliwa pa a megamit king metung a pusyun carin la.

Lamierda – palipas oras keng api-agcatan
mamasyal king metung a lugal, at nu’ cayabe la
ring mipapamilya at/o micacaluguran bilang
pamagmasusi king nanu mang ocasyon deti.

‘Casingkilan pago’ – ing cabaldugan niti
matalic a cacaluguran, cakilala, capanalig
at aliwa pa, acayabe alimbawa keng obra,
at saca maluat nang cayabyayan~.

LEAVE A REPLY

Please enter your comment!
Please enter your name here