Home Opinion Magaral tamung Capampangan (12th of a series)

Magaral tamung Capampangan (12th of a series)

183
0
SHARE

Masulisita – dacal a cucutang at pakialaman
Macontang-contang – mamurit-murit
Mapamatulus – alang capirmian a salita
Mapamatacad – alang sariling disposisyon

Talintingan  –  surian banayad, pakibaluan ustu
‘Casebian a lucsu na ning indung cambing
ing biseru ngara  pin ken antimurin’ –
depende king maki-catawan marahil.

Casebian yang e ra sucat pagmasakit
Ding ninu pa man a medyu mepalantic;
Caustan ing dacal na lang ken meyakit
Pindeo ya’y mister king uli nang misis.

Nung nu’ ing kecatang  binie  alimbawa
Ilang ring lalaking sobra caganaca
Karing asawa rang cabucas man ala
King siping da e ro’ pagdulapan ata?

Ing galo ya buldit potang  masambut ya
I misis keng sugal,  mibawi ya sana,
Kian ne luban pare, paraman neng pera,
Yan ing maging dalan ban kumet i Eba.

At kian na ne itaya ing pane nang wasan
A para cang mister mu dapat ipacan;
Pasari namu ning panganabu na nian
King bisyong kesira na puri’t dangalan!

Mayuyut – manabu, manacbag, mabaldug
Magayut – magalo pangimut, malantung
Mapamaugi – babaing mapamie motibu
Casantingan – E matsura, e masanting

Calapdan – babo na ning biga, calualasan
‘Pusad ning dagat’ – calalaman ning dayat-malat
Tultulan – singcabilis mulayi, mulandit
Lanubu – suli ning sagin, tangke ring tanaman
Sangang bucu – bunga ning pipalutan (pale)
Gasul-gasul – bugasuc, alang ingat, dapal.
Malamiac – macupad;  sobra cabagal kimut
Malanasi – aus careng biabas a manibalang.

Isima – isara;  Ilantang (ing dase keng lande)
Sesilyu – barya;  Manunggal – tig-isa (sa tagalog)
‘Casebian a libe silyo bacal’ – iti mangabaldugan a
ding ayasawa ring micapatad, micapatada la naman.

Magdulap  – mangalap, lumawe,  manintun
Sinalagpi – mengatuangan, kapamilya ring meging
asawa at aliwa pang camaganac ning metung a taung
atyu na king estadung ausan da, lalaki ya o babai.

Tacalananan – metung a clasing pamiparam pera
a ing calacaran pale ing ibayad ning menutang
king picautangan, caras ning petsang pisabi;
nung 500 a pesus ing caban, ing ibayad 5 caban.

Mitas o mibaba ing presyo  ning pale,
e apectadu ing ninu man careti;
at nung ing menutang e minupul iti
king pera carin la mipamayad deti.

Ing picautangan at ining menutang
bista’t ing pisabi reti tacalanan,
king catumbas niti king pera ing miral
nung ala yang ibie pale menamdam~ .

LEAVE A REPLY

Please enter your comment!
Please enter your name here