Ang mga biktima ay nakilalang sina Cristina De Jesus, 67-anyos at ang kanyang 18-anyos na apo na si Carla Bernabe, isang second year nursing student sa Fatima University sa Valenzuela City.
Ang katawan ng mga biktima n may mga palatandaan ng saksak at naliligo sa dugo ay natagpuan sa kanilang sala at silid tulugan.
Ayon kay Supt. Jesus Reyes, hepe ng pulisya ng bayang ito, ang brutal na pamamaslang ay nadiskubre ng kanilang kapitbahay na si Romana Sta. Ana.
Si Sta. Ana ay bibili sana ng gas tank sa tindahan ng mga biktima bandang ika-7 ng umaga kahapon, ngunit walang tumugon sa kanyang tawag.
Dahil dito, sumilip siya sa naka-awang na pinto ng tindahan ngunit nabulaga ng bangkay ni De Jesus na naliligo sa sariling dugo.
Ayon kay Reyes, kasalukuyan pa nilang tinutukoy ang motibo ng pamamaslang habang nagsasagawa ng imbestigasyon ang mga Scene of Crime Operatives (SOCO).
Kaugnay nito, sinabi ng ilang residente na ang pamamaslang sa mag-lola ay nagpaalala naman sa kanila sa brutal ding pamamaslang sa magkapatid na Fredilicta Santos, 79 Lutgarda, 77 ng Barangay Balubad sa bayan ding ito noong Pebrero 2008.
Ang pamamaslang magkapatid na kapwa pinatay sa pamamagitan ng pagtaga ay natuklasan din lamang ng kanilang kapitbahay noon na bibili din sa kanilang sari-sari store.
