1
USTUNG MALAPIT nang miras ing kapaskuan
agaganaka ku’ing meging karanasan
iniang panaun a anak kung maintang
a kanaku mimye masanting a aral
metung a bage a sukat dang ganakan
kareting pengari deting kayanakan
2.
Atatandanan ku magpasku kanita
iniang i tatang ku kaku mengaku ya
bayu lang sapatus ding iregalu na
bilang pamasku ku at pambayung banwa
kabud detang bonus a panenayan da’
ibye nong agad ning karelang kumpanya
3.
Apulu pang aldo ing panenayan ku’
bayu pa miras ing petsa beinti singku,’
dapot dimdam ku la pisasabian daku
ing sabi ng tatang “e kaya magtampu’?
“ing kekatang anak nung karas ning pasku’,
e ku makasaling sapatus nang bayu”
4.
“Uling nandin pamung gatpanapun” ngana’
‘kabud-abud namu memakbung ing welga”
neng ing palakad king karelang kumpanya’,
sinobra kaigpit e na la mibata’
“Isanla ku ne pa ing relos” ngana pa’,
“king ban keng apuntan i pareng Carlos ta”
5.
I pare nang Carlos a kayang amanwan
barkada neng anak a kakung tegawan,
nung bakit puntan ne e ku balung sabyan
pablasang ala neng sinabi pang dakal
basta’t ing balu ku at tawli kung dimdam
magpasku ke kanung malangi paritan.
6.
Dintang ya i tatang madadalumdum na’
atin yang mapilang suput a darala’
at agpang kaniti masakit ya pala’
ing kakung tegawan at e ne magobra’,
pero makanian man nganang mag-istorya’
atin yang inabut a pang noche buena’
7.
Malak-malak na ku mata at pipiling
n’yang e ku mibata agad kung mebating
nung mawala ku man pa’intunan da ku rin
at kanita da pa aisip marahill,
inia linayas ku pauli namu pin
nitang pangaku rang tenge na ning angin.
8.
Kabang maglakad ku king dalan luluyun
miras ku tulid na ning bale maragul;
ikit ku dakal lang taung makatipun
arapan na mismu ning bakal a pasbul;
linele kung bagya at mekiki-mirun
karetang disan kung karin pesitagun
9.
Iti ing bale na ning peka-mabandi’
ampon pilantropu a ka-barangay mi’
a malwat na muring e mumuli keti’
uling Amerika la migdatun deti’
kayabe neng dintang anak nang lalaki’
a ngara metung yang anak a maswerti’
10.
Pablasang ya’ing bugtung a talapagmana’
king egana-ganang bage pibandyan da’
at king kuryusidad, neng e ke kilala’
melaus kung linub ban akit ke lupa’
king atangalan ku mengapakyak ku pa’
uli na ning tagle a kapansanan na’
11.
King bangkung de gulung pakalukluk yamu
at itang buntuk na pane neng duruku
agpang king dimdam ku kanakung abalu
kigli re pala king talangkang damuku
dela de king “states” pekarayu-rayu
ban deng ipangilag king matsurang biru
12.
King atangalan ku ta ku mipaisip
king mabanding anak a pikosu bitis
e ku penamdaman ing nanu mang inggit
kelunusan ke pa’t e buring akakit,
inia ing kanakung meging paginakit
karing pengari ku gulpi ngang mepalis.
13.
Nung makanian pala migit kung mapalad
king kesing-anak kung e makatalakad;
atin ya ping bitis ene man milakad
at e makasulud ultimung tsinelas;
e anti kanaku agyang nanung oras
king nasa kung puntan malagwa kung miras.
14.
Nanan ko retang mal at bayung sapatus
nung karing bitis ku e ko man asulud
migit ko pang buri ring laun at pudpud
a pigamitan kung king baul sininup
kesa king bili nang pane rang guguyud
king bangkung de gulung kabang bie migapus.
15.
At king uli na ning kakung atangalan,
gulpi kung mipakde’t layun apigunam,
ing aku mas ku pang mapalad kabilyan
kesa kening anak dening mayakayan;
“Wa” tutu, agyu rang sali agyang pilan,
pero e na no’ man asulud deti nan.
16.
Inia e ku dapat maginakit pala
karing pengari ku ngening ing tutu na
ala la talagang gaukan karing bulsa’
ban isali ra ku karing pengaku ra’
a nung nu’ ku ngeni lubus akilala’
migit kung mapalad king anak a ita’
17.
Ayalak ku namu king kakung sarili’
a maglakad nakung pauli kekami,
maligaga ku pang linub king bale mi’
at tambing kong kinwa king iskaparati’
sapatus kung luma ban kuskusan deti’
para asulud ku potang simbang bengi’….
