kabang lulukub ya, e me alapitan
subukang gumauk, tyak nakang tuktukan
wari yang menganak, sobra ya kaselan
likas mu siguru, ‘ting pakipaglaban.
aduang pulung aldo, n’yang kami mepisa
mesese king pali, king lukub ming inda
pakaingatan na, mabawas ali sa
mamalugpug binit, kareng maminsala.
pangaras sisilim, nung ala pang pakpak
king silung ning bale, mamapung maralas
n’yang agyung sulapo, king tanamang matas
anggang tyu ke lalam, pane yang puputak.
pag disan ning uran, e makasalilung
kumunan na kami, ikeng balang metung
e kami mebasa, kaibat ning ambun
dimla man e tinggap, uling mikakajul.
n’yang akwa nang tuklu, king tangke ning impun
siping deng kapatad, abe keng magkanlung
kabuklat ning abak, kuldas mu ing layun
mangalkal pamangan, king malualas gabun.
manakit yang kanan, kekami patuktuk
gang eke lalapit, anti yang kukuruk
apibabatan na, dasan man ing danup
sakripisyung gewa, ‘bat pang pangalukub.
anyang meragul na, masias na talakad
mipapalaut rin, melapad deng pakpak
e man alapitan, ing gaindu ming mayap
tatabi na kami, umpisang meyawat.
iyan ing penganak, kabang e pa agyu
upaya ning matua, bie ng buung-buu
nung deng aduang bitis, tatakbang ng ustu
matibeng asangga, datang man ing bagyu.
