(Kaugne ning pamag-masusi para king pang-dinalan at
limampulung banuang aldo nang kebaitan Gat Andres
Bonifacio , malugud neng yampang ning milikas king
amanung Kapampangan king poemang mipamansagan
“PAG-IBIG SA TINUBUANG LUPA”, a sinulat ning mapuring
bayani. Luid ya i Bonifacio, ing KKK at ing katimawan)
NENG: PAMPANG NING ILUG
SA’NU PANG LUGUD ing makapaygit kaya?
king panga-dalise at panga-dakila
a anti ning lugud king ibatang bansa
sa’nu pa mong lugud? ala na pin, ala
Lubus a kapurian, ing pane pagnasan
king balen, ning tau, a maki-dangalan
gumale, magkantang kudtang kawatasan
at ipasyag pati, keragul a belwan
Alang maulaga, ing e na pigkalub
maki-pusung banal, king balen kinupkup
dai at pibandian, belwan, pagal, danup
ing bie naman niti akwa ng mapatlud
Bakit? sa’nu iting, king dagul milalu
a pagkaluban ng kasuywan a buu
a migit king sintang malilyaring tutu
at ing bie nang tagle kaniti mibubu
Ah! iti, ing indung balen kekang tibuan
indu a ya kabud, tamung agisingan
aslag ning aldo na, e mu binang sawan
a babye pali king mabilug katawan
Ing lugud king balen, keni ya misanib
at ding sablang bage, a mal kening isip
manibat king aldo, na ning pangabait
angga na’ing katawan, gabun ya magbalik
Karug a maluka’ing king balen miwale
agyang ken mung diwa sakdal na king lumbe
alang pigagap at pagnasan a tune
nun e ‘ing kesapwakan kung balen akit ke
Kapagpadusan para kanyang kamatayan
nung para king balen tutu yang manyaman
mas lalu ya bayat bage pagmulalan
nung ing ipagkalub, keya kapalsintan
Nung ing balen a iti, manganib yang bina
at iti kailangan ta yang ipamingwa
ing anak, asawa, kapatad at inda
king misan nang aus mapilit sagupa
Sulung na pin, sulung, itamung mabibie
kaniting pag-asang sakdal katiwase
ing apala mu man, mapait ngang pane
sulung ban ibangun balen a mipase
Ikong kelagasan, bunga at sampaga’
ning impun na ning bie, sukat nag nilanta
ning sumbagal ampon masapsap a dusa
maniariwa ya rin, king balen malsinta
Pagkalub yang lubus, lugud a matimyas
kabang ating daya gisanan ipatak
nung king pamamingwa masintang yang ganap
ing bie, palad iting king banwa menibat!
Vhelle V. Garcia
Abu Dhabi, United Arab Emirates
November 27, 2013
