1.
Metung a meging tradisyun king siyudad ning SAN FERNANDU
siyam a aldo bayu miras ing kayaldawan ning PASKU
Ing LIGLIGAN PARUL da ring atlung pulu’t limang baryu
King ROBINSON STARMILLS ning lakanbaleng simbitla ku
2.
Ing syudad ning San Fernando mitagurian ya’t BULALAG
a KABISERA NING PASKU mabilug a Pilipinas
inia naman pagsarian de ring king mangarayung labuad
king ban atangalan deti ring parul a sari TINDAG
3.
King bista’t man pilan la mu ring barangay a makyabe
king ligligan da ning parul DADAYWAN de ring manalbe
ring kundap kundap dang sulu a miyayaliwa kule
king lawiwi ning musika teterak lang makibage
4.
Ngening banwang iti bali apulu la mung barangay
Ding makasadiang makiabe king GIANT LANTERN FESTIVAL
Ing BULAUN, SAN NICOLAS, CALULUT, TELABASTAGAN
SAN JOSE, SAN JUAN, DOLORES , STO. NINO at DEL PILAR
5.
Kayabe ya naman karen ing barangay STA. LUCIA
a kabalitan mu naman king sintingan ning parul da
mekad ding aliwang baryu bayu miras ing parada
makiabe la king ligligang mararapat banua-banua
6.
Ing ligligan da ring parul king panaun a milabas
king balen na ning BACOLOR ing yamut ning pangatatag
kaibat ning mapilan banwa SAN FERNANDO ya milipat
agpang karetang minunang KAPAMPANGANG TALASULAT
7.
Ing siyudad ning San Fernando PEKA-MASALA yang dili
karing sanu pa mang balen ustung karas na ning bengi
pablasang katuklu na pa ning bulan na ning SEPTIEMBRI
makaslag no ring PARUL a pakasabit karing posti
8.
Mabie ya diwa ing pasku king siduan ning LALAWIGAN
e mu uli ring parul a MAGPASALA karing dalan
nun e maging ding magtindang miyayaliwang KAPANGAN
karas na ning SIMBANG BENGI king patsu na ning pisamban
9.
Ing ligligan da ring parul DANGALAN ing darala na
e mu San Fernando nun e king mabilug a PAMPANGA
ding pamilya a lalalang GIANT LANTERN kanita pa
MAYUBUNG PUGE ing dapat ipagkalub ta karela
10.
Antimurin naman karing kekatamung MANUNGKULAN
manibatan pa kanita angga ngening salukuyan
ibie tamu naman karen ing PUGE at KAGALANGAN
uli na ning SUPORTA ra king mesabing KATATAGAN
