Libingan sa lupang residensyal, marapat tutulan

    219
    0
    SHARE

    (Karugtong ng sinundang isyu)

    Sapagkat
    di lamang itong residente
    Na nasa paligid itong tutol bale,
    Kundi ang iba pang kabarangay pati,
    Sa balak itayong ‘private cemetery’

    At di na naisip ni Kap ang posibleng
    Epekto  marahil sa matatakutin
    Lalo na sa mga batang di na natin
    Maaring utusan pagkagat ng dilim.

    Kasi pagkaganda-ganda man siguro
    Ng balak itayong isang sementeryo
    Na nasa sentro r’yan ng barangay mismo,
    Ya’y libingan pa rin sa mata ng tao.

    Na tiyakang hindi aani kumbaga
    Nitong ika nga ay lubusang suporta
    Mula sa iba pang kabarangay nila,
    Kaya huag na nitong ipagpilitan pa

    Ang pasimpleng paghimok nito sa lahat
    Na ng residenteng posibleng di payag,
    Sa isang kunwari’y kanyang pinatawag
    Na ‘public hearing’ ba namang matatawag?

    Pero katulad nga ng inaasahan
    Ay kwenta ang kanya pa ring kagustuhan
    Itong pinilit maisakatuparan
    Ni Kap, kahit tutol itong karamihan.

    Pagkat ano’t tila siya’y pabor pa rin
    Sa pagtatayo n’yan at halata mandin
    Ang napakarubdob po nitong hangarin,
     Kundi nabigyan ng anumang pakimkim?

    At kung anu-ano ang pinangangako
    Sa lahat para lang niya mapatango,
    Kabilang na riyan ang kahit di dumayo
    May trabaho kapag ito’y naitayo?

    Eh anong posible kayang mapasukan
    Nitong masisipag niyang kabarangay,
    Liban sa isa o tatlong taga-hukay
    Ng lupang ika nga’y libingan ng patay?

    ‘Crying ladies’ baga sa mga babae
    O taga-gawa ng korona kung puede;
    Gaya halimbawa riyan ng ‘water lily’
    Na makukuha lang sa sapang katabi.

    At sa totoo lang kahit sementado
    Ang pinaglalagyan ng patay sa nitso,
    Tayo naman kaya’y nakasisiguro-ng
    Di hahalo sa lupa ang katas-tao?

    Kasi bunsod na rin ng laging pagbaha
    Sa lugar na yan na malapit sa sapa,
    Natural lang na masisipsip ng lupa
    Ang anumang ‘liquid’ mula sa ibaba.

    Bunga nito ano pa nga ba kabayan
    Itong mangyayari sa kapaligiran
    Kundi ng posibleng pati ang isda riyan
    Sa katabing sapa duduming lubusan.

    At kahit pa man yan ay isang moderno
    O sabi’y “high tech” na klaseng sementeryo,
    Yan kung minsan kahit sa malaking tao
    Ay isang bagay na nagsisilbing multo.

    Na di madaanan ng nakararami
    Lalo’t kalaliman ng maulang gabi;
    Puera lang marahil sa ibang lalaki
    Na tumatapang kung katabi’y babae?!

    LEAVE A REPLY

    Please enter your comment!
    Please enter your name here