King eran a kwayan, keni ya lulukluk
Kabang magpaynawa, Indu ming malugud
Lalabas keng dalan, ‘tin kaya mamaus
Misan dasnan na pa, ing aldong payalbug
Atin yang istorya, bie ning pamalsinta
Y Ima at Tatang, bayu miasawa
Kwentu ding bapa ku, yang memusitara
Migsilbi yang saksi, king erang gewa na
Melagas deng bulung, banuang mengalabas
Supling pigkaluban, ning Guinu tang Mayap
Banua mung pilatan, ikaming penganak
Meyari ing guera, apat pang midagdag
Pane keng lalakbang, keti tipa’t manik
Maski ke karakal, e binang lagitik
Keti la daralan, deng kekaming bitis
Pepatibeng lakwas, ban e ke daisdis
Memakiasawa na, mikawa-kawani
Lumbe ning Ima mi’t, pamagmuni-muni
Agaganaka na, ing erang dilidili
Keni ke lulukluk, pane mu ing mayli
Kanita misasaglulung, papanik king bale
Kaibat keng memialung, menibat king klase
Masayang salubung, kekami mamakbe
Makanian ya kalugud, lambing ng dalise
Eran ya mang kwayan, o bakal megawa
Sementadong masias, o dutung mitugma
Kailangang dalanan, nanu man ing nasa
Ban e magkamali, e ka mamalagwa
Ala ne ing eran, migbayung panaun
Dapot e kelingwan, aral ng inukul
Mibuung pamilya, metung yang pundasyun
Uling nung matbud ya, matbud yang relasyun.
