1.
Kung ang eleksiyon kaya ay nagaganap tuwing tag-ulan
at lubog sa tubig baha ang maraming kabahayan
di kaya mamumulat ang ating mga kababayan?
na piliin kung sino ang dapat nilang suportahan
mga bagong kandidato kaya o mga baguhan?
ang kanilang iluluklok upang pagkatiwalaan
2.
Tila nakalalamang ang mga bagong kandidato
kaysa mga datihan na lagi nilang binoboto
lalo sa nasalanta ng mga ulan at pagbagyo
na dumanas ng hirap at di matingkalang kalbaryo
dahil nakikita nilang tila walang pagbabago
panahon na anila na magpalit ng liderato
3.
Kung may mga kandidato man silang di ilalaglag
ay ang subok sa serbisyo’t kinagiliwan ng lahat
mga taong mahuhusay na sa tungkulin ay tapat
at laging maaasahan sa kahit na anong oras
subalit ang mga ganid mga pulitikong korap
kapag nagkataon baka lahat sila ay malaglag
4.
Lalo sa hanay ng nasa matataas ang tungkulin
kung tag-ulan ang halalan baka di na tangkilikin
lalo’t baha marami ang nagpupuyos ang damdamin
na di agad humuhupa kahit sila ay suyuin
baka bagong kandidato ang kanilang pipiliin
kung ang galit sa kanilang puso ang paiiralin
5.
Kung ganyan ang mangyayari’y maaring mapalitan
yaong mga pulitikong naupo na ng matagal
dahil sila na lang lagi ang mga nagpapalitan
sa mga pwesto na tila ayaw na nilang bitawan
lahat sila ay maaring sa pwesto ay masingitan
basta di lang magkaroon ng malawakang dayaan
6.
Kung tag-ulan ang halalan at sobrang lalim ng baha
mga dating kandidato ay mananalo pa kaya?
ang mga taong sa pwesto nila ay nagpakasasa
sa panahong inilagi nila na napakahaba
baka makarinig lang ng matatamis na salita
ang mga tao ay muling manumbalik ang tiwala
7.
Kahit na ang halalan ay sa panahon ng tag-ulan
yaong mga nakapwesto pa rin ang nakalalamang
lalo na kung mas marami ang mga botanteng mangmang
na mga walang prinsipyo, utu-uto at bayaran
kaya’t kahit sa tag-ulan pa maganap ang halalan
wala pa ring pagbabago sa mga nakagawian
