Bala kapilan pa a nu’ mipairal
Keti Pilipinas ing Batas Militar,
At nu’ ing upaya mipamisan sikmal
Ning metung a tau king gamat a bakal
At ding sukat niting akayabe mugit
King pamangubyernu kildas na lang pilit
At sinima labi ding keta dusuldit
Sasyo laban keya ba’lang manahimik.
At kilub ning karsil karin da la silmak
Ding keraklan karing aplit gugulisak
At e makisunis king e ustung dapat
Nang Marcos kanita keti Pilipinas
Nung nu’ kabilang ya kanita y Oca
Karing keng kimutan laban king upaya
Niting Diktador a kekatang simbitla,
Ing mekulung ampon digsu ra na digsa
Uling alang kanlap den pekipagkal da
Ing kimutan angga na karin king Edsa,
Ban iting Diktador apakuldas da ya
King pamangubyernu a mipalalu na.
Inyasa’t uli ning mipasobra na pin
Ing karokan ampon dapat niting insil,
Kanita ing malam tamung Cardinal Sin
Tinikdo ne banting mamilatan karin
Kampamilatan ning pangading taimtim,
Ing sana y Marcos kusa neng kuldas pin;
At nu’ mekad iting kapaniawsan nang Sin
Ing meging tangnan king anti nang apigil
Ing imbut nang Fabian – sana yutus na’na
Ning Presidente ing palaso neng bomba
Ing EDSA a nung nu’ karin la kanita
Y Juan ampo’y Fidel a sadyang tau na.
A keta mig-Hudas king keyang gubyernu
Inya mesikan la lub tuki ring tau,
Karing alang kanlap linub king Palasyu
Ban atabi y Marcos busal nitang gulu.
Dapot uling mekad melambut ne pusu
Y Macoy kanita, inutus na namu
Ing karin king Edsa e ra na susundu
Ing minunang planu rang apikasundu.
Inya kemaulian, nyang e ne maguanta
Ing Diktador at ding keyang kapamilya,
Karin Malakanyang kusa rang tinipa
At king bansang Hawaii mipamisan minta.
A nung nu’ angga na ngening salukuyan
King agyang mete ne e re akutkut man
Ing keyang bangkala king ngara ‘Libingan
Ng mga Bayani’ – a e karampatan
Mikutkut kaniting peka-kamposantu
Ding mangarangal a meging lider tamu
Ampon masalpitik a memagserbisyu
Keng militar inyang panaun ning gulu.
At ngening nung wari king maka-kadena
Patlud ne ing dikta na ning diktadura,
Ing kutang: Timawa ne kaya talaga
Ing Pilipinas keng pangayalipan na?
Wa, karing aliwang komunidad mekad
A’yanti mo keti king mal tamung siyudad,
Ing timawang bili at bie kipmwan sampat
Kang mayor Rodriguez ganap nang metupad.
Kapamilatan ning tutung pamagsilbi
Ampon kasuywan a tune alananti,
Inya naman tune yang kapuri-puri
Ing mibansagan a ‘world class’ a Alkalde.
Partikular inggil king pamangubyernu
A kipmwan king linis keng pamagserbisyu,
Pablasang likas king keyang pangatau
Ing ating takut king utus na ning Ginu!
A binang malaut king dapat ding dakal
A nu’ pulitika ing peka-kapital
Deti king e ustu – at kelan masabal
King kaparang tau ing lubus mimiral!!!
