Kumusta ing Aldo ning Amanung Sisuan?

    426
    0
    SHARE

    Lub ning limang aldo a pamagmasusi
    king Amanung Sisuan ning kekatang lipi,
    ikit keng metimyas timan karing labi
    ing Sabing maybug nang king pedestal langi

    At paritak-ditak anti neng akmulan
    Ning salitang inglis at katagalugan,
    Inya nung wari keng metung a tanaman
    Mibalut ne salu keng dikut kakewan.

    King kelan lingap ding aliwang kabalen,
    at nu’ anti ra pang pikakarine ren
    ing makitambulug karing okasyun ken
    a makarikil king pilit tang’ sisesen

    At e buring lumbug keti king masala,
    bista’t kailian da pa mekad ding aliwa
    ing e ke  patugut kaniti mamingwa,
    king agyang balamu biseru keng lula

    At e mi balu nung kenu ke tumaid
    ban e malili at akua nang masagip,
    antining ken alang nanu mang unabis
    material a bage malyaring isulit

    Ing pagal nung inya king bage mesabi
    Ing bayu pang lukluk a Representante,
    E siniput bista’t Guest Speaker ya iti
    King okasyun da ring kadistritu niti

    At e mitubud mang peka-emisaryu
    ban ipabalu na ing sangkan nung nanu;
    At nu’ ing tiburan ya nang ganap mismu
    king dapat gampanan niting siglawe ku.

    O ing taung iti anti-Kapampangan
    yang talaga’t alang bitasang masabal
    para king sarili nang Salitang menan
    ampon kabalen a sukat ipaglaban?

    Makanian man meging matagumpe murin
    ing okasyun agyang ing Alkalde mupin
    ning Angeles at ding galame na niting
    masuyu king balen ding tinagun karin
     
    Kambe ning malugud nang esposang hirang
    a menantabe at menalbe mu naman
    king Zarzuelang waman metung ya mung pinduan
    atin yang malagung aral a melakuan

    Bukud pa karing keng lele ning Museo
    meganap mu namang inalben ding tau,
    A nu’ keng Crissotan, Poesia, Basultu
    at Pulosa dakal la ring migkusuelu.

    Nung nu’ing Ari ning Parnasong Kapampangan,
    migale ya namang gintung kawatasan,
    bilang regalu na karing keti disan
    a tune malugud king Amanung Sisuan.

    At nu’ bistaman ya karin Amerika
    ing santungan niti uli ning obra na,
    pagkapilitan nang keti banua-banua
    magbakasyun banting akasulu ta’ya

    King okasyun a iti a pamagmasusi
    keng kayaldawan a lubus pisamburi
    ding tune malingap king Sabi ning lipi
    a e sukat ume king pangalumpawi

    At mate ganap yan king danggut tang’ dila
    pasari na mu ning papaten deng sarya
    ding keraklan karing atyu keng upaya
    a magsimbambalung malugud lang bina!
    (Pero ing tutu na angga lang salita
    at keraklan e la kikimut bitasa!)

    LEAVE A REPLY

    Please enter your comment!
    Please enter your name here