Madalas, lalu neng aldo kung paynawa
Keng parumingguan a kanakung obra,
Pamamaril ayup ampon aliwa pa
Iti, libangan ku ibat pa kanita.
Nandin, anti na ning mapilan nang aldo
Duminggu ing e ku king dayat mematyo,
Aisip kung imbes mangasu kung bako
Mapa’ king kangatba ku subukan matyo
Ban mamaril namung asan kening ilug
Oneng mipaintagun ing danum malabug
Pablasang ala lang patugut mamalug
Ding aplit sisilo kitig ampon kimput
A nu’ natural mung magalo ing danum
Uli ring king pampang ning ilug dinulung,
Inia ban e na ku nukarin lumuyun
Kabang panayan kong’ sumakang maranun
Sinalilung ku pa lalam ning palapat
Ban king pali na ning aldo e mibilad,
At menintun lugal medyu matas-atas
Ba’kung e manikal keng katatalakad.
Migluklukan ku pa king metung a sanga
Kabang panayan kong king ilug sumaka
Iniang meinip na ku binalak kung tipa,
Muli pa king bale para magpaynawa
Kabang titipa ku kaku yang amatan
Busal ning talaib ing wis a palungan
Inia ing gewa ku king ban e mayabwang
Migkambil ku karing bulung ning tanaman
Agad keng pinorma ing kanakung baril
Iniang akasa ke berilan keng tambing
King tinud a balas ikwa ng meliping
Mipasageuk ya at migbiling-biling
Minyalikadkad ya at biglang mirukduk
Pilan mung penandit mete ne ing ayup
Ot kabira-bira ikit ku lang lalsut
Palwal king talaib ding keyang malutub
Detang keyang sisi e re buring lakwan
Lipungan de’ t anti re mong gigisingan
At uli na nitang kakung atangalan
Ing kanakung pusu dimdam keng mebangal
Sinyap na lang sinyap e la pepatugut
Inia tikpan ku la ding kakung balugbug
Punyebri mo wari a misna king lungkut
Ing kiyak da ring sising kaku mimye takut
Mapilan penandit bigla lang meliswas
Ding sisi at e ra balu ‘nu la marap
Pauli ning sala a kakung arapat
Mirasan lang lugma deting kapus-palad
Manibat kanita kanakung tindanan
Ing e na mamaril ayup kapilan man
Sumbat ning konsensiya ne kabayat dalan
At balang penandit mung gunam-gunaman…
Vhelle V. Garcia
May 21, 2013
Abu Dhabi, United Arab Emirates
