NANDIN, king agya mang e ku balak simba
At malagad ku mung king bisitas munta,
Bigla kung aisip ing panayan da ka
King ba’kung makyagnan simbang bengi keka.
Balu ku, atlu nang bengi ing milabas
E ka pa migpalyang linub king bisitas,
Nya makapihu kung king antitang oras
Arapan ming bale pilmi kang lumabas.
E mu aduang ukdu ing belakan ku na
Ing makiagnan dapot, yan mayayaguanta
Uli ning wali mung magdadalagita
A pane mung abe agyang nu’ ka munta.
Mapilan penandit a pamanaya ku
Abatiawan da kang maglakad dili mu;
Inyasa’t sinulud keng kaisipan ku
King iti, ing peka-masanting a tyempu.
Sangkan kung e male ing ikang daratang
At e ku sasaryan ing keka makyagnan,
Nung inya pasimpli kung linual king dalan
Kabud kalabas mu a mapilan takbang.
Sinigam kung bagya king ba’mung apanisn
King aku ing kekang akatuki nandin;
Dapot waman aku, belikdan mu ku pin,
Mebilis la katuk ding kekang step-in.
Sukad soga alus ing laut mu kaku
King pamituki tang’ balus a lakad mu,
Nyang libutad dalan kabud namu atyu
Ing asna karagul a meliling asu.
Mipagulisak ka, king agya mang iti
E na ka linelen o keungan niti;
At king pangabigla mu rugu milyari
Ing e mu ukulan kekata malyari!
Milayi kang bigla’t kanaku kinaul
Kabang paparak babo ning butarul.
“Tsu” na kang “tsu” kabang e ne man kakaung
Itang tatabi mung Asu’ng asnang dagul.
Ala ne ing Asu, atmu pa katigik
Ing kaul mu kaku ketang e mu malit;
Inya kapakde mu’t pangalino isip
Meninimutla ka king kakung panakit!
E mu ku alawe, dinuku kang bigla
Kabang aku naman pilit da kang yatna;
Inya king makanyan a tagpung e serya,
Ikit ding daralan ing milyaring mala.
Kapurit man ala kang maybug asabi,
Nune ing kitang mu anti ya kanini:
“Nung tutu” ngamu, “ing kaku mu sinabi,
Ituki mo bale ding kekang pengari.”
Natural mu sintang mal dili king bie ku
Ing e ku payali, ngening bistung-bistu,
Meyakit, king ika ating lilihim mu
A dalise lugud kalupa ning kaku!
Balu ku, ing ika, kaku atin kang mua
A pasari na ning penako kung uma,
Misan a menik kung e ke disan Ima
At ing chaperon mu atyu king kusina.
Inya king milyari nandin, keka’t kaku
Alang munang diling pasalamatan ku,
King pangabistu mung kaluguran mu ku,
Nune itang asna karagul ping Asu!
