Ing tungkul king bage e karapat-dapat
Itsimis na GQ ning Ex-mayor Canlas,
Ing keni buri kung adinan pakibat
A e ku tumbasan salitang matalas.
Ala keng lugal ing maselan a bage
Kapanyiran para king personal kung bie,
Ing ngana i ‘acting mayor Wong – kemuan ke;
King uli ning keya ku mipakarine.
Inggil king e na ku kanu peparaman
King keya linapit kung pamangailangan.
Paginakit mu ing king pusu mitanam
Uling kabaryu ke at kakaluguran.
At nung inya anti kung masikan a lub
Mekisabi, uli ning ganap kung talus,
Karing kabaryu nung ating manyad saup
Alang meslam lupa a keya ginulut.
At nung kualta, lalu keng pangka-gipitan
Ayasahan de ring ninu mang karasnan,
Mupin nung maragul ing kualtang kailangan,
Natural mung iti ating kasulatan.
Iti, ing kanakung penaligan ganap
Nung inyasa’t ya ing kakung agad-agad
Aisip lapitan, makisabing mayap
At pilan mung aldo sanang makiliwas.
Kitang na, “magkanu waring andaman mu”
“300k sana,” nganing pekibat ku,
“Gamitan ku la king gabun a seli ku,
Ban ing titulu na milagyu ne kaku”.
(Atin pang aliwa a kakung bayaran,
Inya degul ku la ring kakung andaman,
At king pekibat nang ala yang iparam
Antitang alaga, e ku ne keduanan).
Kaybat nita, waman king metung kung anak
Penabilin na ku ban misabi mekad,
E ku ne belikan, uli ning kang Canlas
Mesora ku king e makatud nang depat.
Simbung na kanaku ning kakung manuyang
A magobra GQ ing pinyabi na nyan,
Ing sangkan nung bakit e ku mekayandam:
Uling kaybat kanu e ku no’ bayaran?
Keng edad ku ngening migit nang otsenta,
Misan man king bie ku, Canlas ing e ku pa
Gewa ing menekas king lagyu ning pera
Ibat king anak kung maintang – mali ka!
At kumpara keka, asabi kung matni
Ing keka mas matas ku siguru uri,
Marangal, malinis, waman ining bili
Pakalulu mu, lubas king salapi.
(Mig-‘Most Outstanding Capampangan’ na ku,
‘Known International Poet Laureate’ ku;
Dakal a mialiwang ‘Award’ a tinggap ku,
E mu keti nun’e pati keng pang-yatu;
Ika, mapera ka, at pamakit mu la
King GQ, a nu’ la makataling goma;
Pero mamye kang ‘Tip’ maragul ne ngara
Ing dinalan uling beinte ka’t singkwenta)!
