I.
King aldo na ning alalan sanakan lang miyamas-amas
detang anggang kandidatung balu tamung gawang mayap
lalu na ring bayung sibul a mengangas maglibutad
bisang sumuyu mu naman kening bansang Pilipinas
II.
Suryan tamung masalese ing karelang pangatau
ing karelang panugali at daralan a prinsipyu
karen namang manungkulang bisang mulit pasibayu
balu tamu nung ninu ngan ding king balen ma-serbisyu
III.
Detang anggang alang sibli’t e na nebangnan ning balen
e no dapat tangkilikan kailangan nong ibalag den
detang tapat manungkulang migserbisyu king memalen
Ila retang kandidatu a e dapat mipaburen
IV.
At ding bayung kandidatu suryan ta lang masalese
nung nanu pin mo talaga ing karelang tutung pake
uling magkang ding taung den bisa la mung makirake
king kaban na niting baleng nanapnapan da nang pane
V.
E mu retang king senado retang dapat a masalak
nun e migit king distritu ampon munisipalidad
uling deti ila kabud ding asahan tang lumingap
karing balen a sakup da ustung ating kalamidad
VI.
E la dapat bubotu ring tatagal a mangatako
alang depat a matinu nun e purus pamanako
antimurin naman detang karing sesyon e papalto
at ding kaibat dang miyalal king bansa no mamaglako
VII.
Balu tamu nung ninu ngan retang dapat tangkilikan
mangayap a kandidatung masanting a kapagnasan
dakal la pa naman den at e ra la mu papansinan
pablasang king pulitika pera-pera ing labanan
VIII.
Isilad la ring mata a mabubulag karing gintu
ibusni la ring isipan, a maluat nang makapaku
karing maling dispusisyun ketang napung migparuku
kening balen a mau na king lingap a sadyang tutu
IX.
Misanmetung tamung kimut, kening banal tamung layun
ban ing balen a makamal, pasibayu yang mibangun
king kekatang pamagbotu, king daratang a eleksiyun
e ta sana magkamali, king kekatamung disisyun
