Keng pulitika, malaguang mikualta

    298
    0
    SHARE

    Dakal lang sasabi at e makalingad
    Kenu man, ing ngara nu’man karing labuad,
    Ala nang tiktak ken king karinat mekad
    Nune ing keng anti kanyan ka magbabad

    Pablasang malagad lang bina ring alus
    Kaniang pulitika e metibe dungus
    Ginamal salapi at e meging marus
    Kabang king tungkulan magpasasang lubus

    Nung nu’ imbes ketang pamagsilbing tapat
    King balen ita ning arapan da’t sukat,
    Oren a magkunwang malinis a gamat
    Sarili rong’ bulsa detang mamatupat

    Karing kualtang e ra pipawasan deti
    A e ra pin sawan lilimas parati,
    Nung inya itamung memalen ing pilmi
    At pane magdusa king dapat da reti.
     
    Potang ing balen yang mangailangan pera
    Para king serbisyong sukat pagkalub da,
    Ilang alang akua nanu mang suporta
    Uling alus gisan da nalang pemulsa

    At ugsyanan de man mekad barya namu
    Uli na pin nitang nipnap da no’ rugu
    Ding salaping dapat king serbisyong tutu
    Karin da itungul ban lunto malagu.

    At saka uli ning kareti menasa
    E tune serbisyo ing karelang nasa,
    Nune alang binit a pamagsamantala;
    Makanyan yang alang asensu ing bansa.

    At ding memalen a sukat makinabang
    Keng buwis ampon katutubung pilisunan,
    Ila ring balamu magpalimus misan
    Pasari ding lider a’yalang pikabsyan!

    Pero nung e mu pin pauli ring dakal
    A magkukunwaring atin lang masabal
    King balayan inya makisamal-samal
    At aplit la reting makitagal-tagal,

    Bistama’t ala lang male agyang nanu
    King tune parasan ning pamangubyernu;
    Mekad ing panyulung at tune asensu
    Maluat tanang king balayan tamu,

    Lalu’t akua tamu pang makapilukluk
    Karing tutung tau a sukat ilukluk
    King tronung mapilan la pamung linukluk
    A e mikamansa o nanu mang buluk,

    At nung inya mekad mapilan-pilan la
    Ding miyanad karing matinu talaga
    Ampon king e ustu e sana migmana,
    Karing pulitikung trapu ing bansag da

    Nune pin king mayap a kararaptanan
    Karin la mitake sana ding keraklan,
    Malaut malyaring ing e karampatan
    Mangibabo laban king tamak a dalan.

    A sukat baltangan papunta king ustu
    Oneng mililisya karing pulitiku
    A mapangupit at pane pamagloku
    Ing balu ra inya mangalulu tamu.

    Samantalang ila a sadyang ala man
    Yatang dinalan a libung makasimpan,
    Ngeni milyones no’ perang tatalanan
    Puera karing e na king bangku milulan.

    Inya uling keti e no pin mipagyu
    Pagkapilitan dong’ tatakas, darayu
    At panilas karing bansang mangarayu
    Ban mekad e ta’la malyaring abalu?!!!

    LEAVE A REPLY

    Please enter your comment!
    Please enter your name here