Kasalanan ning akasya ing banggan dia?

    391
    0
    SHARE
    Nanu’t deni rugung pilmi mu talakad
    At e pangabala kareng dyip at trak
    Pagkapilitan dong’ akutud at sukat
    Ding aliwang tau a magmayap-mayap?

    Nung ngara ban keta lumualas ya’ing dalan
    O’ing McArthur Highway iniasa’t makanian;
    Yan e pa naman pu binang makailangan
    Ban numawa yamu papate ta’la ngan.

    Nanu na la rening aduang ‘expressway’ ken
    A daralanan ding miayaliwang saken,
    Obat kailangan ta’la pa rugung paten
    Ding akasyang deti gilid na ning ‘highway’?

    Nung ngara den maging mitsa no’ madalas
    Ning aksidente at dakal nong’ meyapas
    Karing motoristang mibangga at sukat,
    Yan keraklan pasari namu ning alak!

    Baket isisi ta’ karening akasya
    Ing aksidente ken, samantalang wayta
    Mananahimik ya’t iti ing bingga na
    Nining kalasing a mekasapung kaya?

    At saka nung ngara inya lalapad de
    Ban keta ing trapik numawa’t salese;
    Yan malaut king tune katutuan, abe
    Uling madalas kung magbiahe’t sasake

    Karing pamaserus a kabud la mu dyip
    Ibat Mabalacat papuntang Apalit,
    Antimurin naman Malolos, Calumpit
    Angga na king Tabang at saka pabalik!

    Balu yu nung nanu ing tune dahilan
    Agpang king personal tamung karanasan?
    Ala la pung disiplina ring keraklan
    Karing tsuper tamung lilito keng dalan!

    Partikular na pu ding driver karing dyip
    A nu’ akua na sang’ mamikap ning buysit,
    E ne ilele man (agiang ating pulis?)
    Panayan ne itang ume pang dalakit.

    Nu’man anti lualas ing daralan da,
    King sistemang iti pihung mibara ya;
    Inya nung den ilang mika-disiplina
    Ing matinding trapik pihung maulu na.

    At e no’ kailangan paten ding akasya
    Ban keta’ing McArthur Highway numawa ya;
    Uling anti ta’lang dininan puestu ra
    Ding manintunan keng gilid ning kalsada;

    Inya nung ninu man ing migmunikala
    King ding akasya den kuturan do’ Kaka?
    Ing asasabi ku yuna ta’ne kaya
    King ba’yang patugut, kambe ring aliwa?

    A’yanti mo ining Mr. Tolentino
    A e ta’ balu nung pabor ya o nanu
    King den kuturan la uling ya’ta mismu
    Sinabi nang e ra kasalanan kanu,

    Ding akasayang den ing banggan do’ at sukat
    Uling deti e la kikimut, maglakad
    Nune ding tsuper a ngara e patawak
    King ispiritu nang matsura ning alak!

    LEAVE A REPLY

    Please enter your comment!
    Please enter your name here