ING PAMAGSADIA neng daratang ing fiesta,
e ra balung sabian maging ding makatua
nung ninu at kenu iti megumpisa;
Subali king ngara ing Santa Iglesia
at nu’ e aliwa ing bansang Espanya,
yang pigmulan niting makabusbus bulsa.
Tabalu nung baket dela ra pa keti
ing anti kaniting ritual a mesabi.
Natural mu agiang manutang ka ngeni
e mu papaliarian ing e maki-anti;
Burian mu mo waring ikang bukud dili
itang e magtawu, lunto mainang klasi?
Iting pamag-tawu a meging piugalian
king kalulung tau pasakit nung misan;
Makanano agiang misan ya manutang,
ulining dine na kimut ya’t kimut yan;
At keta, kaibat ning tawu na megisan
atin pang mamintas karing mekipangan!
Kase gawan mu man ing anggang agiu mu,
makarandam ka pang matsurang amanu;
Kesyo, e maniaman ngara’yng kekang tawu,
at magadtu pati nasing inapag mu.
(Mekad mu, e me man kakilala’yng tau
a mekiyagnan mu kareng bisita mu).
Nung supisyenti ka’t katalaksan a beer
atilu ngan keka ding anggang kalasing;
King anti kaniti ing masulit mupin,
potang kargadu no’t papase keng lasing,
atyu na rugu ken itang e masanting
a pamangawan ding makasnuk lalasing.
E ku balung sabian nung baket ing inum
meging piugalian nu’man ping okasyun;
keng birthday lalu na, ken pelalung mirun
e ra ka lakuan den agiang patingapun.
(Misan agiang e me kimbiran ing metung
magampiad-ampiad ya ban ingitan minum).
Metung pang makasnuk a e ustung dapat
ding aliwa ya’ytang kuma la katambak
a pamangan – kaibat lakuan da at sukat
itang e ra’gisan a keta mesamuak.
E ta na wari man rugu apibalak
ing ating gastus yan, at utang mu mekad?
Inia nung aku sa’ king kekong kukutnan,
ing dikil keng fi esta buri ku nang lakuan;
Kase, anti keni… nung kabanalan man,
king tune aske nyan, e na makalugal.
At nung tutung iti anti mung parangal
karing santo’t santa, e dapat makanian!
Obat maliliaring angga mu king pinggan
ampon basung alak magyari keraklan?
Dakal nang fi esta ing kekatang pintalan
at maging itamu denasan ta’na yan;
Pero kapilan ta’na mo gewa itang
sinimba tamu neng Aldo ning Kafi estan?
Inia nung para mo… pamagmasusi ya
ing aldo parangal a para Karela,
o king Ginung Dios iting pamagfi esta?
Aba, malambat nang tinulandung keta
ing tune parasan at paksang diwa na
ning pigagastusan tang’ dakal a pera!
