IBA, Zambales (PIA) — Nagsagawa ng communal stock replenishment ng blue swimming crabs ang Bureau of Fisheries and Aquatic Resources o BFAR sa barangay Sinabacan sa Candelaria, Zambales.
Ayon kay BFAR Regional Director Wilfredo Cruz, layunin nito na palakihin pa ang populasyon ng blue swimming crab at pataasin ang ani ng alimango rito.
Tinatayang nasa 1.5 milyong crablet at kalahating milyong megalopa larvae ang pinakawalan sa naturang coastal barangay base sa BFAR Technology Outreach Station for Marine Water.
Sa karagdagang blue swimming crabs, mapapabuti aniya ang economic gain ng mga maliliit na lokal na mangingisda ng alimango sa komunidad.
Isa aniya ang blue swimming crab sa itinuturing na isa sa pinakamahalagang pangkomersyal na kalakal sa tubig.
Kaugnay nito, tiniyak ni Cruz ang patuloy na produksyon ng magagandang kalidad ng brood stock ganun rin ang pagpapabuti ng Technology Outreach Station for Marine Water.
Papagbutihin din aniya ang mga operasyon ng hatchery kasama ang technical assistance at production support. (CLJD/RGP-PIA 3)
