Kaniang daratang a Martes, a treynta ya ing Agostu
Mika-pulung king PELCO III, abak, bandang alas otsu
King main office ning Apalit, baryu ning Sampaluc mismu;
Iti maulagang bage, a sukat tagunan tamu.
Neng e na makatuliran, gagawan da kekatamu
Ngeni ing takdang panaun, king ba’tamung magreklamu.
Ding kekatamung Punbalen ilang kekata’ mantabe
Ban ing aklis ding memalen, apasyag dang masalese
Iti klasi protesta ya, king aksyon a matiwase
Inia misanmetung tamu, saup-saup, abe-abe
Uling nung e tamu kimut, ing prublema e salese
King mitatas a singil keng kuryenti ring sibabale.
Maragul ing diperensiya, nung kumpara me ing PELCO
King balang kilowatt hour, a sisingil ning MERALCO.
At ketang magsalita ya, mal tang Mayor JUN TETANGCO
Matning palakpakan itang king pamiting mengibabo
Uling agpang king Punbalen, makipagkal la at tikdo
Ding sablang APALITEÑOS at mabilug nang KONSEHO.
Suportan ta ya ing mayap a Alkalde ning APALIT
Kalupa ra talakad ta karing kekatamung bitis;
Nung busten taya ing PELCO, king singil nang makalipit
Itamu namang CONSUMERS, ding magdusa’t magkasakit;
Inia kening kapaniausan, dakal la sa ring mulingid
Ban kanita ining PELCO, ya naman ing mangasaplid.
Kooperatiba ya’ing PELCO, e ya pibandian pribadu
A’yantimo ing MERALCO a sadiang banding gobyernu;
Inia keng kabilian niti, malyaring asabi tamu
Itamung CONSUMER niti – ing ken makibandi mismu;
Itamung pasueldu kareng mangasiwa at empleadu,
Inia mangaintulid mu ing sitan ta’la king e ustu.
Atin lang yulat a kuwenta nung magkanu king pabanua
Ing penakitan ning PELCO ibat king mitalakad ya?
ALA! Agpang king balu ra ding CONSUMERS, ing minye la
Ding mapalad a tinalan king mal tang kooperatiba.
Nung makanian, kenu ta’la dapat tukalan ding pera
A penakitan na niti kilub ning pilan dekada?
Metung pang ken a buri tang iparas o ipayabut
Ya’yning milalu la bilis at kayatat ding mamutut
Karing linya tang kuryente ring ‘line man’ a kabudabud
Gagawan da iting bage binang makasulukasuk
Banting ing ‘reconnection fee’ a pabayad dang dos sientos,
Karela nia miras uling ala lang resibung yabut !
Pamangutang mu kekayu, salukuyan a mumugit
Partikular keng PELCO III, nung atin ken pung matulid
Kuwestyunan mi iting ngeni malino ken mayayakit,
Nung nanu na buri ring kekatamung opisyales
Ya ing ipatupad deti – at itamu pung ‘CONSUMERS,’
At Bossing da retii dapat ing ken alang mando nabis?
King makananung prosesu la mipuk king katungkulan
Ding maging ‘BOSS o Manager,’ ing primerung pakibaluan.
Tildu niamu ning ninu ken a e tamu kamalayan,
At e tamu bitasa mang ken rugu mipasintabian?
Pamangutang mu ing kaku bilang ‘part owner’ na bilang
Ning PELCO III, uli na ning KOOPERATIBA ya pin yan?!!!
