‘Irrevocable’ dapat

    563
    0
    SHARE

    “Saan kayo kumukuha ng kapal ng
    mukha?” ang tanong ni PNoy nang harapan
    Sa nakaraan niyang SONA sa Batasan
    Patungkol sa aniya ay katiwalian

    Na namamayani sa Bureau of Customs,
    Gaya ng ilegal na pagpasok nitong
    ‘Luxury items’ at iba pang produktong
    Di ibinayad ng buwis (kung di Tong?)

    Kung saan bagama’t di pinangalanan
    Ni PNoy ang kanyang pinatatamaan,
    Na posibleng sangkot ay para na rin niyang
    Pinagbibitiw ang kinauukulan;
     
    Na aniya’y tukoy na (kung sinu-sino yan?)
    Ay natural lang na mayrung masasaktan;
    Partikular na riyan ang mga opisyal
    Ng naturang ahenysa o kawanihan

    Na sadyang matapat sa takdang tungkulin
    At ginagawa ang nararapat tupdin,
    Pero sa kabila ng kanyang pagiging
    Malinis ay ganyan ang palipad hangin

    Na mamutawi sa labi ng Pangulo,
    ‘In public’ at dinig ng lahat ng tao,
    Kahit gaano ka kabanal siguro     
    Masasaid ng husto ang pasensya mo.

    Tulad halimbawa r’yan ni Ruffy Biazon,
    Na Commissioner ng ating Bureau of Customs;
    Danilo Lim, Tanada’t iba pang taong
    Nasaktan kahit di direktang tinukoy

    Ang mga pangalan ng aniya’y malapit
    Na n’yang makaharap – at ang di pagbanggit
    Kung sinu-sino yan ay parang parinig,
    Na yan ay marapat nang kusang umalis?

    At  kung di magawa ang dapat gampanan
    Ay di sukat manatili sa tanggapan
    Ng Aduana itong kahit na sino riyan,
    Ang sa SONA nito’y mariing tinuran?

    Pero nang mag-tender na ng resignation
    Itong sina Commissioner Ruffy Biazon
    At mga Deputy sa Bureau of Customs,
    Ano’t tila biglang kumambyo si PNoy?

    At tiniyak niyang napakalaki pa
    Ng tiwala nito kay Biazon, sabi pa;
    At batid kung ga’no kahirap talaga
    Itong pinipilit nilang ireporma.

    Sumunod na nag-tender ng resignation
    Ay ang Deputy Commissioner sa Customs
    Na si Danilo Lim, na sinundang nitong
    Si Juan L. Tanada, na tinext kay Biazon

    Na nagsabing napanood umano niya
    Ang SONA ni PNoy kaya bilang isa
    Na mabuting kawal marapat sundan niya
    Kung ano’ng kay Biazon, bilang kortesya

    Para sa Pangulo upang bigyan ito
    Ng ‘free hand’ kumbaga upang masiguro
    Niyang malaki pa ang tiwala nito
    At talagang kaya niya ang trabaho.

    Nag-file ng kanyang resignation si Biazon,
    Pero tinanggihan ni Pangulong PNoy;
    At ang kina Lim at Tanada’y parehong
    Di pa inaksyonan magpa-hanggang ngayon;

    Kung ganun, ano yang mga resignation?
    At “kapal ng mukha” na kanyang tinukoy?
    Upang di maging ‘moro-moro’ ang aksyon,
    Makabubuting gawing “irrevocable!”

    LEAVE A REPLY

    Please enter your comment!
    Please enter your name here