1.
Ing tete Sta. Monica king balen na ning San Simun
mikabusbus ne entrada anti iniang banwang metung
inispaltu de mu rugu ba yang mitakpan ing kulkul
ban ding sakeng daralakit e ra akwang mangabasul
ngeni mebusbus ne naman ketang dane ning pisuglung
neng alang mamawal lulub karing truck a mangaragul
2
Inia pala agiang truck ban lalabas lang alang patna
dening overloaded a truck king baryu Sta. Monica
ating palang mididinan a bulanan dang akakwa
deinng taung ding lagyu ra kaku e ra pa simbitla
at agpang king impurmasyun at akalap kung balita
magobra la munisipyu ngana nitang memalita
3.
Nung tutu man ing balita ninu kaya ring tatanggap?
e mu ngeni nun e karing panahun a mengalabas
mismung driver ampo pa ring pahinanti da retang truck
ding sasabing bulan bulan ing mamye lang pataluras
trenta mil kanu ing bulan a babye rang para gasgas
ngana pang sinabi kaku nitang metung a kagawad
4.
Mika truck ban na kanita king megawang resolusyun
dapot e metupad itang istriktung implementasyun
makalabas la pa mu rin detang truck a mangaragul
mekad uling ding magbante mididinan lang kumisyun
ban kanita mabalu la nung ninu ring mangumisyun
dapat siguru ing mika-masusing imbestigasyun
5.
Ustung melasak ya’ing tete ing sisi ke’nu mipatan?
kaninu pa nung e karing kekatamung manungkulan?
lakwas king panaun ngening makalbug la ngan ding dalan
nung e magamit ing tete ala ta nang adalanan
at ustung yan ing milyari ing munang diling mituran
ing alkaldi king bista’t man e na rugu kasalanan
6.
Uling ken pang simpling bage sisilipan de’ing mayora
king bista’t man gagawan na na ngan ing anggang agyu na
ken mung rasyun mayayakit dakal na la ring titira
at iti pasari na ning marinat a pulitika
makananu pa nung ini rugung tete masira ya
mekad itang anggang sisi mipatan na naman kaya
