(Iting kawatasan ginale ne ning kekong talisuyu ketang Oktubre 14, 2011 siping nang bangkala ning melapupuring Poeta Laureadu ANTONIO TONGOL GALANG ning balen Sto. Tomas bilang puge at parangal ding kapatad na king panyulat, a penimunan ning Center for Kapampangan Studies, Holy Angel University ampo ning AGTACA at BUKLUD)
Migit kaninu man karing kapatad mu,
Antining ika ing pangane anak ku,
Ikang munang diling panabilinan ku
Karing bage-bage malyaring lakuan ku,
Sakali’t miras na ing tauling aldo ku;
Anak, iti sana kaku ipangaku mu
Gampanan mung ustu potang ala na ku,
Ing pelalung anting lias a sabian ku.
Ika, king bili mu, antimong pangane
Karing kapatad mu ika ing malale;
King sablang tingka ku a malakuan bale,
Ika nang misikap, tangkap masalese;
At sana anak ku… gawan mung matibe
Migit pa king sadya ing kekong pamiyabe;
(Abel), ika na sa ‘ing ganap mantabe
Potang karin na ku king aliwang bie.
E mu papalyarian mipapagkamua la,
King nanu mang bage maging problema ra;
Nung kailangan keta ing mamilatan ka,
E mu na panayan ing silab dagul pa;
King mipmung tetagan ipakit mu sana
Ing ika agyu meng talanan ing renda;
At sana anak ku maging parehas ka,
Karing kekang wali neng amanuan mu la.
E mo’ sa pabusten king metung at metung
Mipapagkatas la’t mipapagmaragul;
Ika, anti na ning ing ibie kung tungul
Ya’ytang nung king bangka ikang maging timun,
Abel, ipakit mu king ing kekang misyun
Buklud yang mamaptas king aldo paintungul,
Mangari ka sana king marimlang danum
A ibat king ulu – e matati sibul.
E mo sa’ paburen king benging kaniglan
Ban e la malili king tamak a dalan;
Nung apalyari mu’t alang kasangkanan,
Katakap ning silim e mu no’ patipan;
Nung magkapilit lang alang katuturan,
Ban e la mitipa – ilikid me’ing eran;
Anak ko, sakaling ating e mipanuan,
E ka pa matudtud panayan meng datang.
E mo’ kukusintian king e ustung dapat
Ban e la mitake, king marok miyanad;
Yusuk mu karela itang makakayap
A maging gabe ra king aldo ning bukas;
Keta, a nung nu’ sa ing dalan a tamak
Ya ing baltangan dang ditman alang kanlap;
Karin, a nung nu’ ing kanakung paninap
Anti kung akakit managumpe ganap.
At e mu la naman pakaban a iki
Ban e la mamiasa’t miyungyung king mali;
Anak a melumo king matsurang gawi,
Keraklan, masulit da nang itabili;
Kalupa ning labung… kasebian, e wari,
Kabang mura ya pa mayan meng apakli?
Dapot nung matua ne, tangapan ta’t ali
E ta’ ne ayalkus king kekatang buri!
Anak, katataulian a keka sabian ku,
Gawan mu sana iti, laus kaniang lub mu;
E mu paintulutan king pamilya tamu
Ing mikakandayu kayu kamate ku;
At nung atin ku mang migkulang kekayu,
Yaduan ku…potang sang’ mitambunan na ku,
Isipan yu namung panaplak king lub yu…
Ing alang ninu man a meging perpektu!
Balu ku… dakal ing kamalian kung depat
A kaku dapat yung isisi’t isumbat…
Ala kung asabi king tauli kung oras,
Nune itang sana… anak ko, patawad!
At nung agawa yu ding kekang kapatad…
Misan mu man sana king pabanuang singkad,
King kakung kutkutan mapa’ kong damusak,
Kambe nang Ima yu, asawa yu’t anak;
Lele ning kandila a kekong italsak…
Mike’ kayu agyang panat mung bulaklak!!!
