Kapilan man, indat bayu mag-alalan
Dakal lang malisuas makitagal-tagal;
At uli ning alang sulit keng makanian,
Maski ninu mu ken makisamal-samal.
Pero nung den kutnan ta’lang tunggal-tunggal
Nung bakit at nanu ing kayang parasan,
Balu ra mo kaya ding mapilan mu man
Itang bage-bage dapat dang gampanan?
Bala’ring aliwang makiki-alkas mu
Ing pamanungkulan mengaring manusu;
E ra’na isipan king ing alang balu
Magkang lunsut ya man mamusbus yang bangku.
Sayang at nung tutung e ra naman agyu
E no’ sa makiapus makiki-alkas mu;
Karin, a ing belwan da mipapatlalu
Nang’ agawa na pin ning ken alang balu?
Isip ding aliwa pangsarili kasi
Nung inia mu mekad tatagal la reti;
Bala ra nung agyu rang libutad deti
Kabud mu antimo ing kang Paquiao ngeni.
E ra na ukulan itang maging sisti
Potang ila na ring misingko kaniti;
Karing atyu na ken malagad la kasi,
Ding taganang biasa at makaintindi.
Menasa kareti atin la sang’ pera
Mangasikan la lub kabud na lalarga;
Nung nu’ karaniwan na karing anti la,
Ing mag-asu-asu karing kabagang da.
Pablasang muna king sablang bage keta
Ing masalapi yang matatag tagana;
Karas king anti yan – lalu pa’t sikat ka,
A’yantimo karing tanyag a artista
Biasa la mung sake kabayu – at saka
Magpalundag-lundag deti sasambut la;
Ayantimo’y L.L., e wari pati na
Ing katlung puestu keng gubyernu, wagi ya?
Kalupa ra naman ding sapni nang Erap,
Bong Revilla, Sr. Lapid na ning Porac;
Den agyang ala lang belangkas a batas,
Sasambut la uling masyadu lang sikat.
Pero, nung ngamu ken bisa lang libutad
King uli ring pera deting ipangangas,
Asus, misip-misip la sanang banayad
Ba’lang e misubu, manyayang mung oras.
Ating kasebyan ken, keka ulitan ke,
Tabalu mu pin nung iti dimdam mu ne:
Ing metung a tau, nung lihim kamwan me,
E na kailangan ing pamarius meng mate;
Ita mung akua meng asoso, makiabe
Kumandidatu ken aperwisyu mu ne;
Nung yan masambut ya, ketang e mu male,
King pangasambut na: ANTI MU NENG PETE!
