Samutsamut na ya kulul / ing banuang misna kababậ,
at ding alino king gabun / kakabậ nong bagyabagyậ.
Ding lelangan a pang-aldo / magbalik no karing lunggậ,
samantalang ding pangbengi / alus migigising la pậ.
Ustung makaniting oras / i Pedru karin akit me,
king lalam na ning akasya / libutad na ning marangle.
Babatyon ne ing aldo a / lalbug nang kalakalale,
anti ne mong pakilupa / king sisilim ning kayang bie.
Kabang ing sala’t dalumdum / taimik lang mipaniaul,
magbalik king kayang diwa / ing milabas a panaun,
aniang ing pusu nang Maria / at ing kaya meging metung,
king lalam na ning akasia / kabang kiket ya ing dulum.
Saksi ya ining tanaman / karing makuleng pinandit,
a pisulu rang mitmu king / tulang alang makaigit.
Ding sampaga’t ding talubang / ampo ring magkantang pipit,
marilya la king yumu na / ning kapalsintan dang ikit.
Karing sakdal a amanu / mataktak dang pisumpanan,
ing makapikawani mu / karela ing kamatayan.
Dapot ing palad ning tau / mapanyunu ya nung misan,
simsam ne ning kamatayan / ing dalaga nang palsintan.
Melasak na yamu kabud / ing yatu da ring paninap,
a pisulu rang sinulsi / king karinan ding alapap.
Miglau ing kabaldugan / ning sabla king biglang kurap.
Ing menalili ing pait / at lungkut a meging ganap.
King pinandit muring ita / mete ne ing kayang pusû,
abe neng dinulung Maria / king kutkutan da ring bigû.
Bulag no ring kayang mata / karing aliwa pang lagû,
pauli ning e na imbut / ing maglilu king pangakû.
Ngeni ustung sisilim na / mamarap ya king parobậ.
Kabang alben ne ing aldong / ditakditak mawawalậ.
Panigapu na kang Maria / itang dakitan na ne sậ
Ban miyabe no king labuad / na ning alang anggang tulậ.
Rodel E. Gozum
20 Septiembre 2015
