Ing Salitang Kapampangan

    1556
    0
    SHARE

    MAKABA na muring aldo ing milabas
    A e ku mirinan panaun sumulat
    Artikulu dikil king salitang sukat
    Gambulan at sesen banting e mapanat.

    Mupin darala na ning kaku mitungul
    Salitang aliwa a e ku keragul,
    ‘Taglish’ ya kelualan a laman ing kolum
    A keni mitutuk mantinyan kung medium.

    At antining agiang kapampanganan ke
    Misan king pabulan ining kaku mibie
    Espasyo a sukat talnan masalese,
    E bawal, ini pa ing kanakung ibie:

    Salukuyan keti king Pampanga ngeni
    Ating adua o atlung Istasyun TV,
    A nu’ ring talapamalita da reti
    Garil la menasa king sariling Sabi.

    At dakal a mali ing Kapampangan da
    Nung inya imbes king iti magambul ya,
    Mekad lalu yamung keng burak mibara
    At mate uli ning antiting sistema.

    Kasi pin nung pane salitang e ustu
    Ing karen parating daramdaman tamu,
    E kaya’ing kaulian niti bandang sepu
    Ya’na pin man itang yan matda neng pihu?

    Pasintabi karing Talapamalita
    Ding istasyun TV (at maki-upaya)
    Ing sana kanaku, iti e ra ikamua
    Uling ala namang matsura kung nasa.

    Nu’ne itang aku bilang kapatad yu
    Keng Media buri kung idake kekayu,
    Ing nung makananung itamak keng ustu
    Itang e makatud a pamangamanu.

    Antimo pin ken ing salitang ‘ulaga’
    A madalas deti ipagkamali ra’ng
    Presyo ing katumbas a kabaldugan na,
    Yan king Sabing English, iti ‘importance’ ya.

    At ing makatud a Salitang katumbas,
    ‘Alaga’ – a nung keng English, ing katumbas
    Na pin niti ‘amount’ – at e ing ‘importance’
    A kabaldugan ning ‘ulaga’, kapatad.

    Ing ‘liban’ madalas deng ipagkamali,
    Ding keng CNN, a mekad ing buri
    Na niting ipasyag salitang ‘subali’,
    O ‘puera pa’, inya tutulid ke mali.

    Kasi, ing tune na pin pung kabaldugan
    Ning ‘liban’ – ‘pinasok’ keng Katagalugan;
    At keng Sabing ‘English’ iti – ‘entered’ neman,
    Makanyan ta’lang keng ustu tuturuanan.

    Ding amanung ‘saka, ampo, at’ o ‘ampon’,
    Den keng English, ilang ausan dang ‘conjunction’;
    Pero ing ‘at’ kumpara keng Sabing ‘ampon(g),
    Usually diff ers with on certain occasions.

    (Example:
    “Nandin, nanu la ring ikua mung memaduas?”
    “Tilapia, kanduli ‘at’ mapilan pantat”
    “Nanung inulam mung mengan nanding abak?”
    “Pritung tuyu ‘ampon’ paksing talimusak”)

    Lagyung tau, lugal, oras ‘at’ panahun
    Karen ing ‘ampon’ e masanting ‘conjunction;
    Bista’t malyari lang ‘pangatnig,’ panyuglung
    Ing kamaulyan na – e lunto manayun.

    Nung minamayap yu ‘ampon’ e ikamua
    Kayabe keng Media, Talapamalita,
    Makasadya kaming magprisintang kusa
    Sumaup manulip ban magluid ing nasa!

    LEAVE A REPLY

    Please enter your comment!
    Please enter your name here