(Bistaman iting kawatasan a sinulat ning makalagyu lalam, a makarikil king Aldo nang Kebaitan ning mapuring Alkalde ning Angeles City, Kagalang-galang EDGARDO “EdPam” PAMINTUAN, a mipagmasusian keta pang Pebrero 23, 2014, kambe ring keyang kapamilya, kayabe opisyales ampon kakaluguran, milabas na at e milimbag king takdang aldo iting masampat a puge para king aldo mesabi, busten yung ing poesia a makatagulaling kaniting masayang okasyun ing ibie mi pamu para king malugud yung pamamasa ngening kaorasan. E ne aibie agad ning sinulat kaniti king maluka yung talasulat iting malagung poesia nung inya meyatrsu ya pangalimbag king kekatang PUNTO Central Luzon News).
ING BULAN NA ning Pebrero beinti tres ya kabilangan
Yang aldo nang kebaitan Mayor Edgardo Pamintuan;
Ing pigkalub nang serbisyu nung iti kekatang susuryan
Binye na ngan ing agyu na, iting balen baneng suywan;
Ding memalen Angeleño matapat nalang pigsilbyan,
Inya ngening kayang Birthday saganan yang palakpakan.
Kaibat na ning palakpak yu, lawen yeng aldo makaslag
Keti siyudad ning Angeles king serbisyu nang linatag
Kilub na ning pilan banwa masalusu yang miglayag
Karin king banuang katasan susulagpo, mamayagpag,
Inya itang Angeleño sukat tamung magpanatag
Kabang Mayor ya’y Pamintuan, ing balen lalu yang tatag.
Inya ngeni kekong sabla matning-matni kung sasabyan
Arapan da ring memalen ampon kareting Kapitan,
Maswerti lang Angeleño ‘tin lang lang tapat manungkulan
Alang sawang magserbisyu karing kayang sasakupan;
Kareting kayang serbisyu sambitlan ko ring mapilan,
Nung sakali kukulang la, ibie yo ring karagdagan.
Karetang “informal settler”, ‘ting proyekto nang pabale
Kanyan namang kalikasan, kalinisan, “one million tree”
Ing “renal care” karin ONA, ating “Philhealth” da pang pamye
Libring Doktor king barangay, libring panulu rang babie;
City College, “infrastructure,” kaayusan masalese
Kang Mayor Ed Agyu Tamu… Saup-Saup… Abe-Abe!
Ding simbitla kung proyeto keting balen binye no’ ngan;
Ing kutang ku naman ngeni… king aldo nang kebaitan
Nang’ regalu ding memalen, ing Mayor ban pamatulan
Karing masamyung bulaklak kekatamu yang kwintasan?
Ding liryu at sampagita, ngaku e la karampatan,
Malanat la’t mako banglu karas na ning kabukasan.
Nanu ya mo ing regalung sukat tamung ibie kaya,
A malyaring e kumupas kekaba na nitang bie na?
I Kapitan Lito Ganzon, ing sasabyan niti ngana:
“King pigkalub tamung lamak e ta’man gumastus pera,
Iti nung kekatang ibie pilming-pilming tumula ya”
“Nanu? ” ngara ding mangutang, i-“segregate” ing basura.
Sopan taya king nasa na ba’yang lubus pamatulan,
Ing regalung ibie tamu king aldo nang kebaitan,
Itang “RA Nine thousand tree” dinan ta’yang katuparan
Agkatan lang kabarangay, ing basura pikawanian;
Ing syudad na ning Angeles ba’yang lalung sunlag legwan,
I-“segregate” ing Basura, iti kusa tamung gawan!
Neng Adora G. (Dalagang Baryu) Ferrer
Barangay Anunas, Angeles City
Pebrero 21, 2014
