1.
Nung ing poeta talus ná ing obrang keya mipasá
e ne iti kapilan man musingan ing keyang plumá;
ingata’ne’t paulagan ing mipatung a koroná
a tanda ná ning kabiasnan a pepamaná ning banwá.
2.
Ing poeta katutuan lá ring papalwal náng amanú
uling balu náng utang ná ing kamalia’ná king Guinú;
maingat yáng talasulat dikil king galo ning yatú
magobra yá pilatan ná ning Linalang at ning taú.
3.
Ing poeta maginú yá sumangid ning keyang beluan,
tajimik yàng magumasid karing balang kapalyarian;
nung mistil náng munye aral karing manyad kalinawan ,
ing mumunang mangamanu, ing map náng kararaptanan.
4.
Ing poeta makuyad mù nung manapse yáng salitâ,
e yá manyabing makaba nung mistil náng munye wagâ
e ná dirinan ulaga ing sulsul ding manganyayâ
uling keya, ing mayap mú, ing pakyabaya’nang paksâ.
5.
Ing poeta e yá biasang mamikatsang kalaraman
king ba’namùng apaglualû ing bitbit nang kapanualan;
e ná agiu ing manyirâ, king arap man o gulutan,
uling balu náng mibalik keya ing sablang kasiran.
6.
Ding kudta ná ning poeta makatuklu lá king sunis,
manayun lá pangalala, mapinu la’t misnang linis;
malamyus lá ring sesurang… e kukulang, e lalabis
anti ing timbang náng isip at ning pusu náng malambis.
7.
Ing poeta malinis yá king kilwal man o king kilub
ing diwâng keyá lulukub yá ing kababa’nang lub;
ing abluk ná ning ketasan king pusû ná e màkàlub
pablasang tune náng talus ing buri ná ning Migkalub.
8.
Eata iting poeta, uliran yá karing maldâ
e manumis, e malmura, e mamikatsang salitâ.
E na lalako ulaga ing beluan dá ring aliwâ
uling balu náng e nâ rin talus pá ing sabla-sablâ.
PL Cris Gonzales
