Ing Pasku, nanu ya?

Ing Pasku nanu ya? Nanu ya ing Pasku?
Obat katuklu ning ‘ber’ keng kalendaryu,
Umpisan da na lang patigtig keng radyu
Ding pekapopular a kantang pamasku?

At balamu wari mabilug ketawan
A tatangaran na ning aranyang bulan,
Masayang magkoplas, daralit kundiman
Busal ning kikingking a benging kaniglan.

Pati na sampaga busal da ring ardin
Pabangluan da samyu ing marimlang angin,
Inya nanu’t e ta’ malaguang apansin
Karas ning Setyembre ing magpasku na pin?

Ing Pasku, e yamu kabud panaun na
Ning pamilibayan rigalu at saka
Karing tegawan keng binyag pamamunta
Banting maniad tamung pamasku karela

Nune ban ganakan ing Aldo Beitan
Ning Anak ning Dios king meto’ sabsaban,
At e king malambut a kamang pagkeran
Ding Ari ampo ring taung mayakayan

At antining y Jesus yang bugtung Nang anak
Ning Dios a Linalang king banua at labuad,
Obat e king bale o palasyung pilak
Ampon pagkeran a kasing lambut bulak?

Kasi pin ing Ginung kakataskatasan
Kababan lub ampon lubus kapayapan
Ing keti king yatu nasang ipatangal
Karing tau inya Keyang pepalyarian

Ing misteryung iti, pati panatbus
King sala ning tau ning Malam a Jesus,
A nu’ya linasa at mipaku king Kruz
Kabang ala nemang gewang e makatud

Nune tinipa ya mu pin keti sulip
Ban keta ing yatu akua neng asagip
King panga-guno na nanu mang penandit
Burian ning Ibpa ing lasawan neng pilit

Ampon e manabu king larung bubukal
(Ngarang magsalita ding talapanaral),
Ing taung king bie na mikasalang dakal
Potang miras na ing tauling kayatulan.

Inya mangaintulid mung ing pangasapwak
Ning Nino sukat tang’ ipagpasalamat
King Dios a Miglalang kambe ning masampat
A pamangilala king bugtong Nang anak.

At ing panyatang na king yatung karinan
Ba’na lang atbusan ding makasalanan,
Maulagang bage dapat tang’ ablasan
Kasuywan a lusuk king pusu’t panamdam

Pablasang uli ning Keyang pangabait
King karinan ning lua anti nang pepakit,
Ning Ibpang banal ing lugud nang matalik
King tau bistama’t ala yang balikid

At pane labag king piluluban ning Dios
Ing pamangawan na a pawang mangarok,
Oyan, ing anak Na ing Keyang tinbud
Ban king kasalanan tamu ing manatbus.

Inya karampatan mu ping ing panyatang
Ning banal a Nino ganap pagmasusian,
At pasalamatan king Ginung Miglalang
Ngeni angga na king tauli nang panyatang

Kristo keti sulip ban ukuman na la
Ding mabie at mete, nganing santong Biblia:
Detang mapamintu yuli Na la Banua,
At king Impyernu la ring palpikasala!