1.
Saglit mung king kanan kaku yang a uma
karing kakung mata dinukal ing lua
panyu yang maputi pipepe ning mutya
anyang ketang eran mirayu kung bagya
king pamikawani a mipnu king lugma
magpaldas ya pusu nung akung mawala
2
Iniang ketang bakud saktu kung milakbang
“agad kang magbalik” gilisak na pa n’yan
“uwa! e maglambat pekibat ku naman
mamagus ku pa lua kabang makatiman
at ume kung meko tintunan ing dalan
a bangal ing pusu’t likwan ing kabangal
3.
Limbug ne ing aldo ing dalumdum kalat
lalto ne ing bulan ketang banwang matas
orasyun na iniang akwa kung misadsad
ketang pigsaryan ku a marayung labwad
king disan kung kubu bayu ku pa sanglad
seganan daku ring kulayu at kabag
4.
King pasbul ning kubu manene kinatuk
pepaluban daku a mipnu king lugud
mengan kung kapurit king lugma metudtud
waring ing pusu ku ene bisang kubug
ing kakung kasebyan pusung mapapatlud
mate ya nung duldul itang kaya tumud
5.
Iniang ing dalumdum ume neng malapak
king sala ning aldo kabuklat ning abak
ing dapat kung gawan lingunan kung agad
sinarul, tinanam saka ku minggamas
dintang ing disyembri ing pale king dayat
kaku nang pipulan ban idalang gayak
6.
Kanita ku muli’t ing kakung daralan
metung sakung abias at bungang tanaman
sampaga ring dikut king gilid ning dalan
inagatal kula ban king irug iyampang
tatangis ya iniang kanaku yang lakwan
ah, ngeni, marahil tumula yang myuman
7.
Ing pamaglakad ku maki-pulai pa
keta king dane mi atin pamong banda
king kakung tuknangan masayang tagana
at ding taung dakal mikakagulu la
“salamat pu Guinu mekad balu da na
ing kakung panyatang king oras a ita”
8.
At ume kung linub pasbul n’yang busni re
mipapiyak nala ring ing mata kung melare
apat lang kandila retang pakabante
ketang pagkeran na ning irug kung bangke
makatiman ya pa at iniang uman ke
waring sinabi nang “mamun naku abe”..
