Kanitang minuna ing aldo ning layâ
neng pagmasusian de king kekatang bangsâ
ing pamanalala king tune nang diwâ
king pusu ring masa mapali pang binâ
Para karela ing, aldo ning kalayan
pamangilala ya ketang kadakilan
ding bayani tamung mekisalpitikan
karetang kastila a mapanalipan
Kanita ing petsang a dosi ning Hunyu
neng pagmasusian de keti kekatamu
ing lalto mensahi king pusu ring tau
pamisasanmetung da ring pilipinu
Dapot ngeni kening kanakung pamalak
ing aldo ning laya metung niyang palabas
ban ipakit tamu mabilug a labuad
a timawa ne ing bangsang Pilipinas
sayang ing paninap a meyalang kalmâ
ding bayani tamu a mibubung dayâ
uling angga ngeni e ta pa timauâ
ketang alino ning pagbitkil at lugmâ
ita’ng tanikalang king balen migapus
a kelikat da ring kekata sinakup
king angga man ngeni e ya pa mepatlud
o melubak mu man king pangakulaput
Makasaklit ya pa karing bitis tamu
at karing batal da ring pakakalulu
imbis makalag ya tigik de pang ustu
Ding aliwang sukib a taung gubyernu
Uling ding mapilan karing manungkulan
pemulian da wari itang kasangilan,
kasakiman ampon ugaling lamiran
da retang sinakup kaniting balayan
Deigan do pa ring ayup a buwitri
a lalaklak karing mabuluk a karni
King lipunan tamu ila pin ding pisti
Inia ing bie tamu me digpan ning alti
Asabi ta kaya ing timawa ta na’?
nung e pa mimiral ing tune hustisya
nung king kakaluluan makagapus ta pa
at e ya pa ganap ining demokrasya
Kabang ing gubyernu mistula reng pugad
a daratunan da ring mapanarampas
Tune katimawang pagnasan ta mekad
angga nia rugu king kekatang paninap
Kabang dakal la ring lamiran king bansa
ing balayan tamu e ya mitimawa
ding makualta lakuas lang misasaplala
ding kalulu lakuas no mang mibababa
Agiang nanu yatang sistema ing miral
king kekatang bansa ala na rin naman
miyungle ya mu king dusa’t kasakitan
sobrang pulitika nung e ra patpatan
Iwagwag de kanian ing bandera tamu
king petsa a dosi a bulan ning Hunyu
keraklan ding akit ta’ng mamanyaludu
ILA pin ding “DAPUNG”, mikatawan tau…
