Ing matapang

    334
    0
    SHARE

    Caring matun ampon siga king Caloocan
    Y Tiborcio ngara yang peca-matapang;
    Carin a nung nu’ya sicat keng bugbugan,
    Mani-manian namu ing balbalan sicang;
    Yan, e me asindac agiang pang patayan
    Uling masulit meng apamatakutan.

    Kilub ning aldo-aldo king Caloocan calat
    Ing pamangawan nang gulung e mu ditac;
    At uling y Tibu talagang yang masias
    Alang siga carin a keya mangangas;
    At maging deng pulis king mesabing siyudad
    E re tataginan agiang nanung oras.

    Caras keng inuman e me apacurul,
    Lalu pa’t nung beer mu ing caya mu painum;
    Yang Gin o Lambanug antiang minum danum,
    At keng Emperador pang-tunggal yang galun;
    At ya caninu man e pa pepaysaul,
    E me apalasing agiang patingapun.

    At ninung mangangas pakilabanan de
    Ing anti mo cayang matapang keng pate?
    Damdaman dia bosis a keta magkangie
    Mangapali no ring casiping nang bale;
    Carin… alang matun a pekiascalan ne
    Ing anti cang Tibu’ng e tatacut mate!

    Ya ing siga carin a pitatacutan
    Ding sablang salbahe king karelang lugal;
    Ala pang menamun caya kinalaban
    Pablasang balu reng sidsad king kamulang;
    Nung tapang at gilas mu ing pisasabian,
    Y Tiborcio ya’nang cabud cabalitan.

    Dapot king bie misan, casebian e wari
    Ing nanu mang bage ating pasubali?
    Nung matapang ca man at mag-Ari-ari,
    Mecad mu atin cang casucad a sati;
    Antimo ing narra ila ning tangili,
    Macanian mu naman king tepangan uri.

    Misan… iting Tibu, camamaranunan
    Mipasabac ya king metung a inuman;
    At uli ning iti subuc ya calocuan
    Dangat la menasa caya maki-ascal;
    Gewa na lalu yang memagbural-bural
    King ba’re sigurung lalung pitacutan.

    Ing peca-maniaman ketang pulutan da
    Yang carin macapag cabang miminum la;
    At keta bista man e re man kimbira,
    Ya ing mipamintuan king sablang buri na;
    Mistula yang big boss ketang oras a ita
    Uli ning balamu metung yang bisita.

    Mecabulad ngamu busal nitang saya
    ‘ting babaing din’tang a mamius keng camua;
    At keta ring disan mengasdan lang pawa,
    Mengapanganga la’t mengapamulala;
    “Hoy, Tiborcio” ngana, “e na ca tinanda,
    Ing anac licuan mu ne namang mangaga!

    E wari pilan nang besis sinabi cu,
    Ing e me paburen cabang mag-mahjong cu?
    Muli na ca caren, miadia ca canacu –
    Balu mu nang sadia nung nang’ calocuan cu!”

    Ketang oras a ita, linto at meyakit
    King ining Tiborcio ‘under’ ya cang misis,
    At king asawa na masyadu yang daig,
    Uling anti ya’mong Leon king cabangis;
    Magkakalalaki y among anggang binit,
    Pero galgahu ne man pala ing buysit!!!

    LEAVE A REPLY

    Please enter your comment!
    Please enter your name here