Home Opinion Ing mapuring anak ning San Simon, JOSE YABUT, JR

Ing mapuring anak ning San Simon, JOSE YABUT, JR

437
0
SHARE

(Antining ing Kapamalan Panlalawigan atin yang ipatupad a kautusan, a nung nu’ obligadu tamung palual artikulung Capampangan agiang adua mung besis kilub ning pabulan, iting makatuki a makisamut kapurit a English, ya pamung ibie mi para king malugud yung pamamasa). 

METUNG karing meging mayap diling meyor
king kasalesayan ning balen San Simon,
ya’ing tatalangan kung dakila’t mabalor
a malapupuring JOSE YABUT, JR;
e ya mimusingan at mibaba onor
pasari namu ning ausan dang ‘Corruption’.

MIBAIT ya iniang a tres ning Disyembre,
banua ning mil nuebe a treynta tres niti’;
mil nuebe sitenta’y nuebe, likluk ne’y iti
bilang mayor, Marcos niang yang presidente;
at iniang alalan, banuang 1980,
yang sinambut bilang antimong alkalde.

Kaibat ning kanita rebolusyun “EDSA,”
ing meging pamuntuk – Cory Aquino na;
meyor Jose Yabut, kanita ya tipa,
a inalilan nang Gaudencio Pineda;
at kalabas na ning mapilan mung banwa,
Manuel S. Bondoc ing menalili kaya.

JOSE YABUT iniang ya ing manungkulan
alang linapit a mipaimburisan;
makualta ya’ti o dimut a kabiayan,
pante ing istima na’t alang malakuan,
lakuas nung ing tema, na ning pisasabian
ding megarabyadung maintun katalaruan.

King pamanungkulan, e ya migpabustâ
at e menabusu king kayang upayâ;
king kaban ning balen, e migpakasasâ,
kusing man king kaban-balen e kinangwâ;
liguran ne’ing balen, a kayang pemingwâ
laban karing taung matuling a nasâ

Ing ‘Peace and Order’ ken, iniang panau’na
masalese dagus, ating disiplina ;
at uli na pin ning taganang mayap ya
ala yang tigatig, nu man lugal munta;
e ya benggatibu, inia ing suporta
na ning masa lubus mipa-misan kaya.

Bukud king dalise nang pamanungkulan
ing panugali na, mipnu king kayapan
paniali na namung, panulu nung misan
ibie na la karing taung mangailangan;
e bala kaya nung ya ing misakitan
e la muling bigu ring maniad kasaupan.

Pelalung anak na, iniang yang alkadi
e re pengangas ing karelang pengari;
karing mestra’t mestru, ra ampon kaklasi
e ra pemaragas, pepabalu reti
ing ila metung la karing meging suli
ning taung king balen maupayang dili.

SANA, ing San Simon, e na akwang lumbug
karetang sistemang misna king kabuluk;
atin sanang lunto, a’yanti kang YABUT
ban sagip king balen, bayu pa malumud ;
inia ring memalen, dapat na lang kimut,
ba’nang mapatpat, ing GAWANG E MAKATUD…

Vhelle V. Garcia
Abu Dhabi. U.A.E.
September 21, 2020

LEAVE A REPLY

Please enter your comment!
Please enter your name here