KASEBYAN, ing kanung mapanako ngara
Mua ya karing mapanako kalupa na,
Antimurin ken ing babaero, mua ya
King anti yang mapad king e na asawa.
Uli nyan dakal ken ding babaeru
A e bisang maki-kaluguran guapu,
Pasari ning magkang e ya inodoru
Ing puntukan na neng king bale alayu.
At i misis ya ing pane nang darasan
Neng ining tuturing nang kakaluguran
Mamasyal ya’yti karelang santungan,
A nu’ e ne wari niti papanikan?
At kabang den ilang adua kilub bale,
Natural mung iti pakipagkwentuan ne;
Kyan na ne umpisan king pakakalale
Kuanan a mayna keng simpling pasakalye.
Keng patampa-tampa at pakalbit-kalbit,
Yang babai agyang e magalo buldit,
Akwa nang matuksu niti keng alimit
Ning lalaking ngara pin sobrang kabilis.
Patye ing babai kasi ing memuri
E malaut misalatan ka palipi,
Uling agyang sangkan nang simba saguli
Akwa na’na niting milabas a pali.
Anti kasi keni diskarte nung misan
Ding mamyalung api, ngana ning kasebyan.
Myaliwa na ken ing gagawan dang tangnan
King ba’lang mibastag king aus ning laman.
Madalas, agyang ding mikumpare’t sabla
Mipaglimid la keng daing a mabasa,
Inya makanyan yang mamigaganaka
Ing babaeru neng king bale yang ala.
At uling iti yang pamirapat-dapat
Ning sobra tako keng pindang a e malat,
Akayagnan dya mung keng dalan maglakad
Ing keya, aliwa ne pulayi utak.
At pablasang iti ing pyalung ning loku
Pigaganakan nang ating makisulu;
Nung nu’ natural mu, yan ing mamiligru
A ngaring makatwa – ing mitwag a kwelyu.
At uling menasa, ing sabo na ngara
Ning kasiping bale manyaman tagana,
Nanu’t kabud iti atakman mu lasa,
E mu limiran o panakawan keta?
At uling mas kanung manyaman ing bawal,
Makanyan dang lalung kapad ding keraklan;
A mas buri ra ing makisalikutan,
At kang kumpare ra makisulung pinggan!
Disyembre 29, 2005
