1
Ing libru ning kapalsintang, sininup ku ketang napun
mibusni ya kalabas ning, makaba mu ring panaun
kabang iti babasan ke, king diwa ku miglimayun
Itang makule samulang , mepupus mu king pagmalun
2.
Pablasang ing pilsintan ku, atin yang ketasan puluk
a yang meging sangkan na ning, kekaming pamikanlaut
e ya biasang mamatawad, ing pusu nang alang lunus
karing simpling bageng e man dapat ikasukal nang lub
3.
E ku ne sana biklat at binasa pa ining libru
uling aganaka ku mu, itang anggang kabiguan ku
migit pala ing kaplas a panamdaman ning pusu mu
nung ing kinayap nang biyuk masugat yang pasibayu
4.
Dapot uli ning ing tuksu, masikan yang manamuyut
pilit nakang itaginis, a papunta king impiernus
ing libru ning kapalsintang, malambat nang makasinup
milage ya ibat ketang baul nung nu’ ke selikut
5.
Nung abayu ku mu sana, itang karin pakasulat
alilan ku itang tagpung king pusu ku minie sugat
gawan kung purus masaya, itang lugma at pagsalbat
a kanaku menalipan, king panaun a malambat
6.
Ban kanita itang lugud, a king pusu ku memale
manatili nang busilak, king kayang pangadalise
ban pati na ing malugmang tagpung milyari kening bie
alibayan kung ligaya, ampon mayukang tagumpe
7.
Dapot nanu mang gawan ku, e ku na ngan ayalilan
Itang anggang pakasulat, a laman da ring bilungan
pakasimpanan ku ne mu’t e na basan kapilan man
ng istoriang makapalub, king libru ning kapalsintan
