1.
kutang yu kaku nung ninu karening kakandidatu
king daratang a alalan ding pilinan kung ibotu
pakibatan ke ing kutang nung mali ing pakibat ku
isipan ye at ikutang mu naman king sarili yu
nung parewu ta pamalak tugma tamu king prinsipyu
at metung mu kapagnasan para king balayan tamu
2.
Munang diling ibotu ku retang medyu mayap bagyâ
bistaman mangurakut la atin la sa’ng agagawâ
kumpara naman karetang kabud mu magpakasasâ
king kaba’na ning balen at alang nanu pa mang gewâ
a nung wari karing asan burian ku ne ing bilasâ
kesa karing maumuk a bayu bayu pa mung timâ
3.
Ngaku wari, atin kayang taung mipnu kabanalan
ing e metuksung ginauk ketang makabusning kaban?
iti metung ya mu karing makasinup a diparan
a subuk na king panaun ding kekatang pipumpunan
pekamayap ya mang dili e ya makapangilag man
nung mibabalangi la ring manamuyut king dewakan
4.
Atin waring damulag ing e bitasang mikaburak
king mapilan penandit a pamaglublub da king labak?
Atin kayang pulitikung e menako agiang ditak
king bangan a datukanan ding salaping limpak-limpak
metung la mu pangatungi ketang tatalna’nang akbak
nitang “Hudas Iscariote” king imbut da at pamalak
5.
Inia ring kakung pilinan ding bagya mu mapanako
pablasang e la limatak e la tantung mangatako
uling atin lang pikabsian agad la mu ring titikdo
ketang dulang a makaba kaibat dang menilup sabo
e anti karing aliwang e na bisang mamaglako
anggat e ra ananapnap ing laman ding angang silyo
6.
Detang taung kilala ku at kaku makakilala
ila ring kakung ibotu kambe ring kakung pamilya
e itang balu ra ka mu karas ning pamangampanya
at e na biasang manatu ustung makalukluk na la
detang ating masabal at maserbisyu karing masa
antimurin ding e maklak ampon makapiyak a mata
7.
Detang pante panlalawe king karelang sasakupan
lakuas king pamipairal ning batas at katalaruan
detang makakilala king kekatamung karapatan
a maralas madakurak pasari ning kakaluluan
detang taung maprinsipyu at agyu rang talakaran
itang sablang pangaku ra king karelang panibalan
Apin ngan den ding pakibat king kutang a pakutang ku
a pilinan kung iyalal ban kekata mangubyernu
retang mayap bagya uling kilala re pa ing Guinu
e anti karing lamiran a sugu na ning impiyernu
ngeni aku ing mangutang ninu ring kekong ibotu?
nung parewu ta pakibat mituntun tamu king ustu!
