KABANATA 1B
Kamalayang Kapampangan
Ngeni, ika mo, Kaluguran, nung ati na ka keti kanita, ninu mo kaya o nanu mo kaya ing minuna mung amalayan? Ding kasiping mung bale? Ali. Ding kekang katubale? Ua, ua pin, e uari?
Ngeni naman, kareting katubale mu at karing bage atiu king bale, nanu o ninu mo kaya ing minuna mung amalayan? Mekad e naman malaut king katutuan ing sabian tamung ing mumunang-mumuna mung amalayan (bilang tau, bilang Kapampangan) alang aliua nun e ing kekang indu, indung Kapampangan.
Ditak-ditak, ditak-ditak, amamalayan mu ing pali at lambut ning salu nang sasandalan mu, ing pali at lambut ning takde nang pagkeran mu, ing pali at lambut ning palad nang mamapis keka ampon pipikpik. Amamalayan mu la ding labi na ampon arung a dusulditdusuldit mumuma keka, ding susu nang ututan mung alang patugut, ing linamnam ning gatas nang , agyang e mu pa balu, maging dake ne ning kekang pilubluban. Amamalayan mu itang bau nang e mu abau kapilan man king ninumang aliuang babai o lalaki a milapit keka. Amamalayan me itang siuala nang makabie alanganggang kapasngauan kabang pagtumaila naka o pakisabian agiang e ka pa biasing magsalita.
Ing mumunang diling amamalayan na ning metung a Kapampangan kanita, ya pin ing kayang indu, indung Kapampangan. At ing kadua, ya pin ing amanu, amanung Kapampangan. Anti ing sinabi ku nandin, ing gatas a asususu na ning bingut maging pilubluban ne at, manibat king pilubluban a iti, potang datang na ing panaun, lumual la ring amanu, amanung Kapampangan. Ing amanung sisuan (the Kapampangan language).
Ing katlu nang amamalayan ya pin ing ugali. Ugali ring katubale. Ugali ring kasiping bale. Ugaling Kapampangan (the Kapampangan character). Ugaling maging uri ning pamibiebie o kulturang Kapampangan.
(Abatan ya ing kasuglung)
