Obat kasaspak mung salu ing tagumpe
Ning para mung taung lalagu pagkabie?
At keta anti mung maybug pakipate
Potang damdaman mung iti pupuryan de.
Obat anti ka mo’ waring lalasunan
Potang yang paksa ning nanu mang kapuryan?
Nanan mu na keta ing ating salangsang
Ban ing kaplas mung lub mirin’ kapaldanan.
Misan, nanan mu na ing mitakid ya sa’
King ba’yang misakab king bie nang payapa,
Uli ning bina mu rugung katutula
Ing akit meng bige keti king masala!
Ala kang akakit nune ing mali na
A keta agad mung king dalan titinda;
Pero nung kapuryan sa’ ing agawa na,
Angga mu pin ketang sasalikut mu pa.
Yan, king kapilan man e sukat mamale
King kaisipan ning taung masalese;
Uling liyus maka-kayap king keyang bie,
Mekad mu, king marok karin ne atake!!!
