I.
I Ompung metung yang marangal a pulis
alang papanigan nun e ing matulid
e ya abusadu tapat at malinis
king pamagserbisyung siyam nang banwa migit
II.
Dapot ketang misan, kapitangan bengi
asaganan ne ing metung a babai
ala yang sinelas gugulisak ya’yti
a panagalan da ring limang lalaki
III.
Ing metung karetang lalaking tatagal
anak ne ning Huwes king karelang lugal
uling malasing la pilit deng kukuanan
anak a babai rang lepastanganan
IV.
E bisa i Ompung at uli na nita
pisaupsaup de ring lalaking lima
mitda ya animut iniang migising ya
atiu ne uspital a pakaposas na
V.
Uling ing babaing kayang piglualu
mete ne pablasang berillan de salu
at metung man karing taung makabalu
pasari ning takut menahimik la mu
VI.
Baril a megamit king mete dalaga
apin itang kayang mewalang pistolya
yang meging batayan ding mig imbistiga
a abe nang pulis ketang istasyun da
VII.
Inia ing katutuan gulping misalikut
uling e no linto ring taganang sangkut
a dapat mu sana a ila ring milub
king sukulan king ban karin na la muluk
VIII.
pikpuk ne ning ukum ing kayang gabelyu
kaibat nang mebasa ning atul king kasu
mipamulala la retang anggang tau
king meging disisyun na nitang husgadu
IX.
Pablasang balu ra ring karin tinagun
alang kasalanan ing anak a ompung
biktima ya rugu king pamikatagun
ampon impluwensiya ring kaya midalum
X.
kilub ning usgadu kabudabud namu
memakbung at ing judge misalbag ya bungu
pati ing anak nang abusadung tutu
mitimbuang mu naman ketang kayang bangku
XI.
Ini palang ompung kabang tataryan de
ring mapilan pulis a sadia nang abe
minyamsam yang baril, tambing pepakbung ne
karetang mitata a agnan nang pete
XII.
at karin bignus na kayang paginakit
a migsalita king masikan a bosis
migsikap ku ngana a magi kung pulis
ban ipatupad ing batas a malinis
XIII.
Biktima daku ring marawak a tau
a magserbisyu king kekatang gubyernu
Ila ring king batas a linto sangganu
a e na dapat mie keti babo yatu
XIV.
Ngeni dakpan yu at kakung tanggapan
ing maging atul king kakung kasalanan
tutal ikua ku na itang katalaruan
karing taung dapat muluk king sukulan
XV.
Metung ya i Ompung karing mebiktima
sistemang mabangnas ning hudikatura
a ustung miniral itang impluwensiya
itang katalaruan mayayalang kwenta
