Canitang aplit cung manasic, darangle
Dili-dili cu mu carin king maragle;
Acu mung sinarul, solu cung minaswe
At acung memunla king tenam kung pale.
Acung miglagumba, migpasacang danum
Neng iti, mau keng gewa kung paranum;
Acu murin itang king abonung gabun
Kinalap, ban keta sumanting ku pupul.
Acung patingapun king pale sisyasat
At king aliwa pang cailangan king dayat;
Pati pamangan na ning cacung damulag
Acu mu naman ing manintun, magdulap.
King eganaganang atiu king taldawa
Acu pa murin ing lilingun, gagawa;
Ala, ninu pan man ing sinaup mo’sa
Angga king mepalut at saka medara.
Obat ngeni ping yan kakung babalusbus
Dacal la ring cacu makisaup-saup?
At nung nanu-nanu ing carelang yaluc
Uli ning balu rang atin lang asaluc.
Pagdala ra cu mang mialiwang capangan
King camal na niti e cu maybug cuanan;
Uli ning balu cung presyung tacalanan
Itang lalacu rang yatad king dayatan.
Balu ra cu potang adidinan cu la
Ding keraclan karing durulung, pupunta;
Nung nu’ malamang ing damdam cang matsura,
Potang ating e cu adinan carela.
(Tabalu nung bakit meging panugali
Ding aliwang tau ing e ustung gawi;
Ing Ortelano ken nu’ya magcabili?
Ngeni waring dacal, pamie na’na wari?
(Ing acakit da ren pawang pakinabang
At e ra lalon ing keyang capagalan;
Sasarul ya pamu migagastus ne yan
Angga na king iti panupan nang tanam.
Balu ria mung ayan a pibale-bale
Ngening ding aliwa balu reng mapale;
Dapot niang aplit yang sasarul, mamaswe
Labas-labasan dia carin king marangle.
Dacal itang e ra balu ring keraclan
King bie Ortelano, mabayat pusanan;
Carin a nu’ne pin niti lacuan, dasan
Ning pali ning Aldo at dimla ning Uran!
Map a map micalma ya’yting mupul sapat
At e ya mirasan king albug o malat;
Canita ya mica-sobra agiang ditac
At king autang na nyan makapamayad.
O nung mipaintagun mica calamidad
At ing keyang tenam gisan da ring ulad,
Mecad metung mu man alang cusang mampiad
King santungan niti ban dumame agad.
Iti ing menasa maging calbaryu na
Ning bie Ortelano kecaban ning bie ra;
A e na manuman nung iting Sistema –
Ing ya balu ria mu neng yan pupupul ya!~
