Kasebyan, yang tukil nung ala yang laman
Mabiung ya’yti potang ing angin masikan;
King tau madalas makanyan mu naman,
Nung insanu’ing ala yang tiktak kayabang.
Kalupa na mo ning mayangin a buntuk
A milalu labul kabud yang mibugnus,
Deti ila pin ding ausan dang paratut
A maki-oxygen king mingatbang bagyus.
King angin, ninu na wari ing mekakit
O sinabing ta’ne king gamat ayapis?
Yan atyu king taung babangka dusuldit
At keng bulung dutung ugunan nang aplit.
Pero nung manintun kang mapayapang bie,
Mangubuan na ka mu karin king marangle;
Waman ing angin ken masikan at pane,
Malinis naman at tutung madalise!
July 25, 1999
