(Iting kawatasan malugud keng yampang cang Indu cung ibatan a meyangu-bie ketang Enero 25, 1989 bilang panalala king Aldo nang Kematayan.
Sinulat ke iting poesia ketang Enero 24, 1990 bilang dake king pamagmasusi ning pamilia king kayaldawan na ning tradisynal a Lukas-Paldas a ausan da.
Malugud kia mu namang yampang karing sablang Indu iting malukang kawatasan para kaniang daratang a Daun o Todos Los Santos).
Kinasal cang Lunis,
Catlung aldo datang
Binawi Ne keca;
E miliban Biernes,
Buri meng alilan
Maca-casal na ca!
Dapot nang’ ipalit
Cang Indung ibatan
Nung yang maco keca?
Yan ing cacung pilit
Buring pakibaluan
At ikutang sana.
Asawang babai
Buri meng palitan,
Mayan at malagua;
Nung meco ya ngeni
E’ca dumayu man,
Atin na cang akua;
Dapot king pengari,
Nu’ca pa macacuang
Ipalit aliwa?
Cagulut na niti
Maging paninap man
Pawa nang mistula!
Kecasal mang tune
A keca linugud
Mipmung catapatan,
E mu rin mipate
King dalise lugud
Ning Indung ibatan;
Nu’ anti catibe?
Teya nang melaus
Ing bie nang ingatan,
At birian ing mate
King ba’nang icabus
Ing keca nung misan.
E mu mamagcanu
Itang casakitan
A pibabata na;
Anac king uli mu,
Gewa nang panilan,
Pait man sa’ ita!
Nanu mang depat mu,
Caya minie subiang
E na tenam keta,
Nune king sala mu
Macatiman ya pang
Mematawad keca!
Nu’mu pamo akit,
Pacamal na’t lingap
Ning metung a Indu,
Potang keti sulip
Maco ne ban mukiat
Karin king marayu?
Nu’man anting tangis
At libung pagsalbat
Ing gawan mu bungsu,
E mu na abalik,
Lugud nang malablab
King merimlang salu!
Sucad man sa’ banua
Ala nang babaing
Migit pang dakila,
O mibas mo sana
Maging kenu karing
Pilsintan mung mutya;
Libu mang anti’la
Akit mu pa murin
Keti king masala,
Dapot solung matua,
E ne magbalik pin,
Cabud yang mewala!
