128 Taon Matapos ang Kalayaan – Korapsyon, Kahirapan at Kawalang-Pananagutan Pa Rin ang Humahadlang sa Ganap na Kalayaan ng Sambayanan.
128 taon na ang lumipas mula nang iwagayway ang watawat ng kalayaan. Ngunit ngayong 2026, isang tanong pa rin ang muling bumabalik:
MALAYA NGA BA TAYO?
Malaya ba ang mamamayang taon-taon ay lumulubog sa baha, habang ang pondo para sa flood control ay natatangay sa agos ng korapsyon?
Malaya ba ang manggagawang nagpapatakbo sa ekonomiya, kung ang sahod niya ay laging kapos para sa pamilya?
Malaya ba ang magsasakang nagpapakain sa bansa, kung siya mismo ay nagugutom at baon sa utang?
Malaya ba ang kabataan kung ang pangarap nila ay mas madaling maabot sa dayuhang lupain kaysa sa sariling bayan?
Noong 1898, lumaya tayo sa dayuhan. Ngunit ngayon, may mga bagong tanikalang nakasakal sa atin—korapsyon, kawalang-panagutan, at sariling interes ng mga nasa kapangyarihan. Hindi na banyaga ang banta; ang tunay na panganib ay kapag nasanay na tayong tanggapin ang mali at manahimik.
Sa Hunyo Dose, hindi sapat ang magtaas ng watawat at umawit ng Lupang Hinirang. Ang tunay na kalayaan ay ang tapang na manindigan, magpanagot, at kumilos upang iangat ang naaapi.
Ang kinabukasan ng bayan ay wala sa mga pinunong ating inihahalal—ito ay nasa tapang ng mamamayang tumatangging pumikit.
Ang kalayaan ay hindi lamang minamana; ito ay ipinaglalaban sa bawat salinlahi.
