1.
King matas a guedung, linundag ya’ing adic
cadugpa na lalam, mepacli ya bitis
iniang damputan de, ring dintang a pulis
at idala ra ne, caring orthopedic
ayli-ayli ya pa, saca ya gigigic
a waring e man mo, menamdaman sakiit
2..
Caras king uspital, nung nu ya midala’
lawe-lawe ya mung, mandalangat mata’
pilan mung penandit, ding capamilya na’
dintang na la naman, menantabe caya’
kitnan de nung bakit, depatan na ita’
pekibat na niti, ya canu i ” DARNA’
3
At calabas na ning, mapilan mung oras
ala nang epektu, ing droga ng liclac
canita na dimdam, lilitic a caplas
uling mimasmas ne’ing, mepata nang utac
cabud abalu nang, ing e ne milacad
gulping ginaleung, king cama magbatbat
4.
King uli ning droga, sakildap mewalâ
itang paninap na, a anti mong bulâ
nung king pengari na, mekiramdam ya sâ
e meging masulit, ing disan nang calmâ
at sumisi ya man, king cayang agawâ
ala nang malyari, tauli na ing sablâ
5.
Inia ing payul cu, keco’ng cayanacan
miwas co king drogang, salut king lipunan
caring lungad lungad, pa king drogang bawal
cabang maranun pa, sumaca na co ngan
uling icayu ing, tune capanayan
king icasaplala, ning mal tang’ balayan…
