Malagad lang tutu ding tapat makyabe
o retang awsan dang kaluguran tune;
uling ding mapilan ala lang marine
at balu ra ka mu nung atin kang babye
Dakal a mialiwang klasing kaluguran
ating mayap karen at ugaling basan,
atin mu ring Judas e apagtiwalan
ipisali naka nung e makinabang
Ating mababa lub at agad magtampu
makapal a lupa at alang istilu,
at karen atin mu namang abusadu
mapamiru ampon tahimik mung tau
Ating matas a lub e tatanggap mali
a maging dalan na ning pamikawani
atin mu ring pikun, agad mikapali
karas karing birung sadyang e ra buri
Atin mu rin namang pane mung kakabid
neng kailangan da ka karin mula akit;
at karas king puntung ika namang gipit
agyang atin la ren e ka makalapit
Ating kaluguran a miangat mung bagya
king bie na, asna ne katas a talanga;
inya akwa yu mang makapisagana
balamu yang e me keyabe bitasa
Dapot ing makanyan a gawi ning tau
ya pin ing ugaling emu na abayu;
uling ala namang mibait perpektu
ninu man kekatang mabibie king yatu
Tune kaluguran e ra ka ibalag,
kayabe mo reti king tula’t pagsalbat;
balu rang balikdan ing gewa mung mayap
at e la painggulut angga man king wakas
Ila retang tune ating malasakit
at king makakarok e ra ka itaid
ipaganaka ra ing ustu’t matulid
nung malilili ka’t magugulu isip
At ila mu naman ding tutung darame
king manawa’t maskup a landas na ning bie;
e la mangalingwan, den atilung pane
kamtan da man deti ing sablang tagumpe
Tune kaluguran makanian la dapat
E la masisilo king kinang ning perlas,
king karelang pusu manatiling wagas
ing pami-abe yung e dapat kumupas
E baling ing tau a kaluguran mu
maki-kalokwan ya at medyu magulu
kesa king tahimik ugaling demonyu
a mitulak keka karin king impyernu
Importanti ika makyabe kang tapat
karing kaluguran a keyabe malwat,
lalu na karetang manibat king ibat
kasulu mu nala at kataling pusad
Nung ika atin kang tune kaluguran
ipagmaragul me’t kekang pakamalan
ila pin ding gintu a e man kikinang
matas la kilatis migit king nanu man…
Vhelle V. Garcia
Abu Dhabi, United Arab Emirates
April 20, 2012
