Bustan mu ku Indung balen buklatan ta’ ing milabas,
Ing panaun a miralan karing salu e mebaklas;
Itang bie mu ketang napun keng pasakit ka tatalas,
Guguyud kang kasakitan binekut mu anggang wakas;
Iniang ding pamilyang Flores ilang linto mibalangcas
Bantayug yang mabie keka simbulo ning aldo bukas;
Ninu wari ing pundasyun king gubyernu rang pepalkas
Likuan nang Domingo Flores, menan da ring kayang anak.
Sinabi nang Dr. Rizal ketang kayang Tauling Pamun,
Ing pibandian at dangalan iti keka man mitipun,
Nanu mo ing ulaga na nung atyu ka king pagmalun;
Ing pakamalan tamung balen iti karin ya migkanlung
Inia masampat ing mate o ing mayapas maranun,
Nung kaibat ing balen tamu tikdo ya sa’ at mibangun;
Arapan ning Bagumbayan nitang kikiak a panaun,
Berilan deng alang lunus – mibual king marimlang gabun!
Makanian lang migmasakit ding anak ning Indung Tibuan,
Ing balen tang’ Macabebe deti labis deng liguran;
Inia y Domingo Flores e sinukung mekilaban,
Binekut ne ing balen tang’ kitmuan gilas at tetagan;
Ding piratang manligalig at ‘Seven Fleet’ keng danuman,
Pekikuanan nang simbulat ing tatanam dang kaguluan;
E bala ing miragsa ya mipase king kaparangan,
Kamtan damu ding memalen ing sampat ning kapayapan.
Nung datang ing kasakitan pasari ning kalamidad,
Kakawen da itang albug ding kalulu tang’ kapatad,
Ding aliwa sinampa la keng bubungan pakasapad
Ban milisia keng panganib itang bie rang sawimpalad;
Gewa nang Domingo Flores helicopter lang sisimbad
Ding magdala ketang rasyun karing tau na payatad
Makanian yang mikalagyu nu’man suluk na ning labuad
Ing balen tang’ Macabebe – iti ala nang katulad.
Dakal pa ing miayaliwa, kabayanian a gewa na
Karing anak na at suli, iti likuan nang pamana;
Ngeni ninu ing magiting Alkalde na ning balen ta’
Nune’y Annette Flores-Balgan a anak nang tapat keka;
Bistaman babai yamu, ing justisya’t disiplina
Malinis nang pepairal lalam na ning Demokrasya;
Ing tetagan na’t kayapan agpang king matuang istorya,
Kaya likuan nang penilas ning bayaning Tandang Sora.
Maigpit nang kautusan at bagsik ning kayang atul,
Ing sikanan na ning Droga asupil na at asaul;
Inia oyan ing balen tang’ maliaring apagmaragul
Karing miayaliwang balen king ligaya tang’ apupul;
Dapat ta’yang koronahan kaniang gintung makalangkul
Mayor Annette Flores-Balgan king gewa na ampon payul;
Dapat tayang ipag-viva gulisak king banuang asul
Magluid sana ing kayang bie saupan ta’yang alang tutul.
King minuna’y Bobong Flores meging Alkalde ya naman
Gimpanan nang mitmung tapat at maluat yang menungkulan;
Dapot lipat ning kalma na at tagumpe nang kakamtan,
Patraydor deng buring bagsak ding kritiku na’t kalaban;
Ding dakal nang kapanalig at pamilyang katapatan,
Bignusan dong aping balas ba’lang mako mitakutan;
Bobong Flores e mesindak kinaul no at kimbilan,
Linigtas no’ keng panganib dela na la king Batasan.
Makanian deng aluguran pati anak dang malati
Angga ngening matua na la, deti e la kinawani
Ding kritiku nang kalaban marinat a panugali
E la murin menagumpe keng kabiguan la misubli;
Ibat kang Domingo Flores kambe da ring kayang sapni
Korona ne ning dangalan miputung king kayang lipi;
At nung y Tarik Soliman ya ing bantug tang; bayani
Dapot ding pamilyang Flores ilang martyr tang’ tutiki!
Diosdado L. Mallari, PL
Barangay Sta. Maria
Macabebe, Pampanga
